Hulanda a cera su frontera pa Latino America y e deseo di Hulanda ta pa Aruba tambe cera su frontera cu e paisnan cu ta cay den e region aki. Esey ta loke cu Minister encarga cu asuntonan di Turismo Dangui Oduber a bisa den conferencia di prensa di gobierno mainta.
E ceramento di Hulanda cu Latino America “por tin consecuencia pa Aruba. Hulanda lo tin e deseo pa Aruba tambe cera nos fronteranan cu Latino America. E ta wordo considera. Tin e posibilidad cu KLM por stop e vuelonan pa Aruba y e lo complica e situacion pa e isla,” Oduber a bisa den su conferencia di prensa.
No mester lubida cu KLM ta e aerolinea cu ta transporta tur remedi for di Hulanda (Europa) pa Aruba y tambe e vacunanan cu mester yega denter di algun dia.
Den cuadro di loke ta pasando, e mandatario a bisa cu gobierno ta den contacto cu VNO encuanto e posicion cu Aruba ta bay tuma pa cu Latino America. Inclusive, awe tin un reunion di Crisis Team unda cu ta delibera e ceramento di frontera cu Latino America. Si tuma e decision ey, e mandatario a priminti cu lo informa esaki den un conferencia di prensa awe mes.
E paramento di vuelo di KLM ta hinca Aruba sigur den un preta y e mandatario mes a bisa esaki tambe pasobra Aruba lo mester busca un alternativa pa tur e remedinan, inclusive e vacuna, yega Aruba. “Semanalmente tin remedi ta yega pa hospital. Den e pandemia cu nos ta mester garantisa cu e “supply” t’ey na tur momento pa pais Aruba. Mi no ta kere cu Hulanda ta asina iresponsabel di tuma un decision pa stop e vuelo di KLM y laga Aruba sin e remedinan pa trata su hendenan, specialmente e pashentnan di COVID.”
