Hulanda kier mas envolvimento den husticia na Aruba

No ta di awo, sino ta for di algun aña caba cu Gobierno di Hulanda ta purbando pa ta hopi mas envolvi den husticia na Aruba. Te awo nan no a logra, pero cambio di Gobierno ta poniendo nan haci un esfuerso nobo. E tactica sinembargo a cambia, semper y cuando cu e mesun obhetivo. Si no para duro, pronto lo maneha husticia na Oranjestad via Den Haag!

Na e momento aki tin tres cuerpo arma Hulandes purbando pa traha independiente di Cuerpo Policial Aruba. Ta trata di Recherche Samenwerkings Team (RST), Kustwacht di Caribe Hulandes y Koninklijke Marechaussee (KMAR). Tur kier haya nan mesun recherchenan pa nan mes conduci investigacionnan, sin cu mester pasa via Polis.

Den un prome intento Hulanda no a logra. Di eynan a cuminsa cu un formula pa descredita autoridadnan local pa asina haya un motibo valido pa mete. Gobierno a cuminsa investiga Gerald Vingal na Migracion y a mande cas. A tum’e bek per na disposicion di Minister y cu un ekipo nobo na Migracion y Warda nos Costa. KMAR ta loco pa duna un man na Migracion y ta ofreciendo pa firma un protocol nobo cu Gobierno, aunke esun actual ta vence te December 2019. Claro kier adapta e acuerdo y den esey ta duna Migracion acceso na informacionnan di KMAR a cambio di mas sosten di Hulanda pa Aruba.

Kustwacht di Caribe Hulandes a pidi pa nan mes haci nan investigacionnan, pa nan mes emplea recherche cu ta investiga nan propio casonan. Awor aki cada biaha Kustwacht detene hende riba lama, nan mester pasa e caso na Polis.

Y por ultimo RST tambe ta bogando pa haya mas autoridad, pa nan tin nan mesun “tapkaner” pa tap telefon di sospechosonan y sigui hende via nan mesun team di observacion. Awor aki nan ta uza Polis pa tur nan trabounan di inteligencia. RST a inverti hopi placa den un oficina nobo, ultra moderno, den Mariniers Kazerne na Savaneta. Asina ta purba uni Kustwacht, KMAR y RST bou di un solo dak!

Pa duna e idea ey bida y pa busca simpatia y sosten, a start un campaña di desacreditacion di Cuerpo Policial Aruba. Hulanda kier mustra Aruba cu nos mes no por, cu Polisnan no ta integro, cu ta un motibo valido pa bo confia nan y no traha cu nan.

E desaroyo aki ta hopi serio y ta rekeri accion urgente di Parlamento, cu mester vigila movecionnan di Minister Andin Bikker di masha cerca pa evita cu ta bende nos autonomia hudicial na Hulanda. Cu Minister mes ta pidi Mariniernan pa yuda den core tras di ilegalnan ya ta demostra cu ta bentando serbete den ring. Na Corsou ya Militarnan ta yudando Polis den varios caso, cu ta un fenomeno masha peligroso. Na St. Maarten tambe. Pesey falta Arubapa entrega nos autonomia pa Hulanda tin henter Caribe Hulandes domina hudicialmente tambe.