“Met de regeringen van Curaçao en Aruba werkt Nederland aan concrete verbeteringen. Bijvoorbeeld door meer Nederlandse bedrijven te interesseren om op Curaçao te investeren en door de verbetering van de jeugdhulpverlening op Aruba te ondersteunen.” Esaki ta un parti di e parafo di e discurso di nos Rey Willem-Alexander cu ta toca e paisnan den Reino Hulandes, na apertura di e aña parlamentario di Hulanda diamars ultimo.
“Cu esaki Gobierno di Hulanda ta ratifica cu nan ta para 100 porciento tras di e maneho di Gabinete Wever-Croes pa locual ta trata e ehecucion di e Crisis Plan Social na bienestar di nos hobennan y nan famia na Aruba”, asina Minister Plenipotenciario Guillfred Besaril ta informa. E mandatario cu tabata presente den e famoso “Ridderzaal” na e ocasion di e apertura di aña Parlamentario Hulandes a sigui elabora cu e sosten aki ta muestra di e confiansa di parti Gobierno di Hulanda den e plannan y maneho pa bin cu un solucion pa e problemanan social na Aruba.
“De pleno comienso di nos coalicion Aruba a keda sacudi cu un caso sumamente lamentable. Un caso cu a confronta henter Pueblo di Aruba cu e realidad social cu nos isla ta bibando aden. Accionnan concreto mester tuma luga pa evita cu un caso asina nunca mas bolbe ripiti. Cu e sosten aki di parti di Hulanda nos coalicion ta sigui pone pasonan positivo den direccion na ataca e problematica social na Aruba. Mas lihe concretisa y cuminsa ehecuta e plan, miho!”, Minister Besaril a termina.
Recientemente un delegacion di UNICEF tabata na Aruba pa yuda cu e plan pa por brinda nos muchanan proteccion.
E Crisis Plan Social ta aloca 32 miyon florin pa cuminsa atende cu e problemanan social. E siguiente paso tabata pa busca asistencia di organisacionnan internacional pa yuda. Den bista di esaki a acerca UNICEF pa brinda sosten y experticio na ehecucion di e plan aki.
Foto cortesia: Hans Kouwenhoven.
