E carta cu Secretario di Estado, Raymond Knops, a manda pa Prome Minister mr. Evelyn Wever-Croes ta indica cu diabierna awor Conseho di Minister di Reino lo evalua e proposicion di e conseho di supervision financiero di Aruba, CAft, pa duna Gobierno di Aruba un “aanwijzing”.
E carta di e mandatario Hulandes ta confirma e analisis cu 24ora.com a publica algun siman atras cu CAFT a “changa” Gobierno di Aruba cu e aanwijzing aki.
Den e carta e mandatario Hulandes ta indica cu Gobierno di Aruba por bringa e aanwijzing aki den Raad van State (Conseho di Estado) conforme e procedurananancra den e ley Arubiano di Supervision Financiero, e Landsverordening Aruba Financieel Toezicht (LAFT). Secretario di Estado Raymond Knops a indica cu na momento cu Raad van State evalua e apelacion di Gobierno di Aruba, e lo por evalua alabes si e base legal di e aanwijzing aki ta adecuado.
E base legal di e supervision financiero ta den duda despues cu fraccion di MEP a cambia e ley cu su mesun Gobierno a presenta. E cambionan di fraccion di MEP a kita tur autoridad di Gobierno di Reino pa supervisa e finanzas di Gobierno di Aruba y ta bay contra e palabracionnan haci entre Gabinete Wever-Croes y Hulanda. Pa purba scapa e palabracionnan haci entre Aruba y Hulanda, Prome Minister Wever-Croes a manda un carta pa e mandatario Hulandes indicando cu e no lo pidi Gobernador di Aruba firma e ley di supervision financiero cu su mesun Partido den Parlamento a cambia. Aparentemente e mandatario Arubano ta prefera un problema entre su Gabinete y Parlamento di Aruba cu un problema cu Hulanda.
Raymond Knops, den nomber tambe di Prome Minister Hulandes Mark Rutte, ta bisa Evelyn Wever cu keda sin pidi Gobernador di Aruba firma e ley cu Parlamento a aproba no ta suficiente. Nan ta urgi Evelyn Wever-Croes p’e manda Parlamento di Aruba un ley nobo cu ta djis cambia articulo 14 di e LAft manera palabra entre Evelyn Wever-Croes y Hulanda fin di aña pasa.
Si e peticion di e mandatarionan Hulandes ta realistico no ta conoci. Parlamento di Aruba a pospone un debate cu Wever-Croes riba e decision di Gobierno pa keda sin firma e ley cu Parlamento a cambia den tur nan sabiduria. Bou di e circumstancianan aki ta premira cu Raad van State lo dicta riba e base legal pa e “aanwijzing” aki.
Si acaso Raad van State indica cu e base legal no ta corecto, por spera cu Hulanda mes ta pone e base legal aki na su lugar den forma di un Algemeen Maatregel van Rijksbestuur. Ta conoci cu esaki tabata riba agenda di Conseho di Minister di Reino na 2015 caba. E tempo ey Gabinete Mike Eman a scapa di e berguensa aki door di bin cu un Landsverordening Aruba Financieel Toezicht. Ta parce cu e acionnan di MEP den Parlamento lo forsa Gobierno di Reino pa e biaha aki si regla e supervision financiero di e forma aki.
