Despues di un wega yena cu suspenso den FIFA Women’s World Cup France 2019 entre Hulanda y Hapon, Hulanda a bay cu e victoria di 2-1 y ta pasa pa kwart final. Asina aki e paisnan Europeo ta dominando e mundial femenino, unda cu e 8 teamnan cu a yega kwart final ta Norwega, Inglatera, Francia, Merca, Italia, Hulanda, Alemania y Suecia.

Notabel di e resultado aki den copa mundial di 2015 Hapon a elimina Hulanda de octavo final cu e score di 2-1, mientras cu e biaha aki e seleccion Hulandes a elimina e seleccion Hapones cu e mesun score y den mesun etapa.

E wega a termina cu victoria pa Hulanda cu 2 gol di Lieke Martens, kende ta e hungado di e wega. E seleccion nacional di Hulanda a domina e wega y a tira 12 biaha riba gol di cual 5 tabata riba e target, mientras Hapon tambe a tira 12 biaha riba gol pero 4 biaha tabata riba e target. Na 17 minuut di wega Lieke Martens ta habri e marcado poniendo Hulanda ariba. E wega a continua fuerte y Hapon ta tabla e wega na 43 minuut cu gol di Yui Hasegawa. Asina aki e prome tempo a bay aden cu wega empata.

Den e di dos tempo Hapon a crea hungadanan pa anota gol, pero no a logra esaki. Riba un infraccion haci unda cu e bala a dal riba e capitan di Hapon, a pone cu Hulanda a ricibi tiro di pinalti. Aki Lieke Martens ta cobra esaki y a anota e di 2 gol na 90 minuut di wega, mientras cu Saki Kumagai ta ricibi carchi geel na 89 minuut. Referee a indica 5 minuut adicional di wega y Hapon a sigui ataca fuerte buscando e gol di empate. Na final Hulanda a bay cu e victoria y ta haci cu ambos team tin 1 wega gana contra otro.

Diahuebs pa 3:00pm Norwega lo ta enfrentando Inglatera, mientras cu Francia ta topa Merca diabierna pa 3:00pm. E ultimo wega di kwart final lo ta diasabra unda pa 9:00am Hulanda lo enfrenta Italia y pa 12:30pm e wega lo ta entre Alemania y Suecia. E fin di siman aki lo haya sa cua ta e 4 teamnan cu lo pasa pa semi final.

Comments

comments