Riba peticion di Gobierno di Corsou, a bay di acuerdo pa uza militarnan Hulandes staciona na Corsou y na Aruba pa sostene Cuerpo Policial di Corsou den mantencion di orden publico y siguridad di obhetivonan escencial na nos isla ruman.
E peticion a drenta for di autoridadnan local debi na un cantidad di manifestacion y disturbionan na nos isla ruman durante e ultimo dianan, incluyendo sakeonan di negoshinan den centro di ciudad. Den esey a cende candela na varios luganan strategico pa hinca e isla den panico.
Defensa di Caribe Hulandes ta ehecuta su di tres meta riba nos islanan, esta pa sostene autoridadnan local. No ta prome biaha cu Gobiernonan ta pidi Hulanda pa sosten militar. Asina Aruba a pidi “zachte bijstand” pa combati e ola di ilegalidad dor di yegada masal di Venezolanonan via laman. Mesora a activa militarnan pa yuda cuida nos costanan.
