Hues: NO ta permiti pa yama parlamentario Rocco Tjon como “pedofiel”

Recientemente Ministerio Publico a cuminsa un caso penal contra e homber Andre Paskel, kende a cataloga parlamentario Rocco Tjon como pedofiel riba Facebook. Esaki a sosode durante un conferencia di prensa transmiti enbibo via Facebook, riba cual el a comenta “Pedofiel na palabra”. Tjon a entrega un keho oficial na recherche y Fiscal a opta pa persigui Paskel. Awe Hues a conden’e na 20 ora di trabou pa comunidad y e tin dos siman pa apela. Abogado Rossi Marchena a bisa mesora di lo apela e caso.

Ta for di basta tempo caba tin e mesun discusion aki riba e miembro di parlamento. E ta un caso masha delicado pasobra aunke cu e yiu muhe e acus’e di a mishi cu ne y e mama a busca tur forma pa keha Rocco Tjon, toch na final Huesnan penal no a mira e caso mesun cos. Na Aruba e mama, cu tabata traha na Ministerio Publico a keha su pareha e tempo ey di pedofiel. A manda busca recherchenan for di Corsou pa investiga e caso pasobra Tjon tabata inspector di polis e tempo ey, encarga cu entre otro JZP.

E mucha a bay na un psicologo di mucha y a conta su storia. E unico psicologo di mucha na Aruba, e tempo ey, a traha un declaracion pero Ministerio Publico a opta pa no uz’e. Docentenan na scol, famia, conocinan…tur a testigua na fabor di e mucha, pasobra el a conta tur e mesun storia. Asina mes ora a yega na Procurador General, el a opta pa no persigui Tjon. E mama a apela e decision na Corte di Apelacion na Corsou y tres Hues a habri e caso di nobo, pero nan tampoco a mira motibo pa un persecucion penal.

E mama di e criatura no a entrega su guera y a bay Corte civil y eynan a pidi Hues pa no laga e tata mira e yiu nunca mas den su bida. Motibo ta cu e mucha no kier y ta yora y spanta ora e mira su tata. Aña pasa ainda e tata a purba via Corte Superior pa cambia e sentencia di e prome Hues civil, pero a perde atrobe. Den e caso aki por mira cu locual e mama y e yiu no a logra den Corte Penal, si nan a logra den Corte Civil, esta pa tin paz den cas.

Asina mes den tratamento di e caso di awe, Hues a sali for di e punto di bista cu Rocco Tjon no tin un condena di Corte penal y como tal no por ta asina cu por yam’e na un nomber asina pisa. E hecho cu e sospechoso den e caso aki tabata colega di e mama di e yiu di Tjon y como tal conoce e storia y e dolor di e famia for di cabes, no a hunga un rol cerca Hues. Tambe e hecho cu Benny Sevinger a yega di gana su caso contra Tjon den pasado pa e mesun asunto, tampoco no a conta cerca e Magistrado.

Consecuentemente abogado Rossi Marchena a bisa na salida cu nan lo apela e sentencia aki y mira si tres Hues lo mira e caso diferente. Lo purba convence e Huesnan cu Tjon tin un historia y como politico e lo tin cu siña biba cu un cuero hopi mas diki.

Ministerio Publico

Awe Corte den Prome Instancia a condena un sospechoso pa un castigo di 20 ora di servicio na comunidad pa insulta parlamentario R. Tjon riba Facebook. E sospechoso P. a yama e parlamentario pa pedofiel durante livestream di un conferencia di prensa riba Internet. Siguientemente señor Tjon a haci denuncia na Polis di daña su honor y bon nomber.

Corte a motiva e sentencia di awe bisando cu e palabranan cu a wordo uza dor di P. durante e livestream no por wordo interpreta na ningun otro manera cu dirigi contra señor Tjon y cu señor Tjon tabata den su rason di pensa cu nan ta dirigi contra dje. E derecho di libertad di expresion ta un gran cos, pero e no ta sin limite. Den un estado democratico manera Aruba ta existi limitenan na e derecho di libertad, ancra den ley cu vista riba derechonan di otro. Yama un hende pa pedofiel ta surpasa e limitenan aki. E ta un atake contra e persona y contra su honor y bon nomber. E palabra ey no mag di wordo usa y señor Tjon no tin mester di accepta esaki.

Di politiconan por spera mas habilidad pa wanta golpi cu un ciudadano comun y coriente, pero esey no kiermen cu un politico ta pafor di proteccion di ley. E decision di Hues ta conforme exigencia di Ministerio Publico.