Politiconan mester asumi nan responsabilidad y no cada biaha mustra dede riba Huesnan ora cu no aplica ley na nan fabor den sala di Corte. Asina Presidente di “Raad voor de Rechtspraak”, esta Henk Naves, a bisa awe den su discurso di aña nobo. “Aunke cu pa e politico ta miho pa e haci comosifuera ta asina, e realidad ta cu Huesnan no ta inventa regla bou di nan manga di camisa. Huesnan ta aplica ley manera cu Parlamento a aproba y teniendo cuenta cu tratadonan internacional. Esakinan ta regla cu Gobierno tambe mester atene su mes na dje!”
E Presidente di e “Raad” a subraya cu personalmente e no tin ningun problema si un politico individual of partido politico kier pinta un Hues como “boeman”. Unda cu si e tin problema ta ora cu un politico, den forma delibera, ta purba di tur forma pa bolter e asunto y haci e Hues un “sospechoso” y tur otro politico ta opta pa keda keto y permiti e tendencia aki.
E Hues a bisa awe cu e asunto ta bay pa sentencianan di casonan cu ta causa un impacto grandi den comunidad, den cual e decision di e Hues ta bou vergrootglas. “No obstante hopi presion den comunidad y di politica, toch Huesnan ta mantene cabes frieu y ta yega na un sentencia independiente y profesional. Esey merece respet, no pa e contra partido acusa e Magistrado! Lo yuda si politiconan por mira nan mes den spiel despues di un sentencia cu no a sali na nan fabor. Stop di sconde tras di nos toga y asumi bo responsabilidad pa leynan y tumamento di decision cu obviamente Boso no tin bou control”.
