Hues na Minister y Director: Boso bay negocia!

Ayeratardi a tuma luga tratamento di un caso sumario cu e Director di Directie Volksgezondheid Aruba (DVG), drs. Jerry Staring a inicia contra Minister Dangui Oduber y Gobierno di Aruba. Hues no a atende e caso completo, sino a opta pa e caminda di “mediation”. El a conseha ambos partido pa bay negocia y si no yega na nada, regresa aki 6 siman pa e tuma un decision. E Magistrado ta mira claramente cu e dosnan aki lo no sali for di e impasse cu ta aden facilmente. Pero el a laga bon cla riba mesa cu no tin motibo ni pa kita ni pa move e Director, pues a conseha nan pa sinta na mesa.
Bufete di Abogadonan Gomez & Coffie a representa Minister Dangui Oduber mientras Bufete di Abogado David Kock a representa Jerry Staring. E abogadonan no a haya mucho chens pa presenta nan defensa, pasobra e Hues a tuma su tempo pa haci pregunta riba e caso mes, mayoria pregunta dedica na Jerry Staring.
Corte a tuma nota di varios caso tras di otro, esun cu perde ta apela. E ta pronostica cu esaki lo keda un bataya di añanan largo. Hecho ta cu e Minister no kier Staring den e funcion ey, no tin confiansa den dje y ta prefera mande un otro departamento. Hues a sigura cu Staring sa esey tambe y cu e mester ta consciente cu no por keda asina pa semper tampoco. Di otro banda, Minister no tin e poder tampoco pa yega kita, move of perhudica ningun Director pa motibo di nan color politico of dependiendo si ta Gobierno di cua asignatura a nombra nan.
Cu e hechonan aki riba mesa, el a conseha partidonan pa sinta na mesa y sali for di otro, semper y cuando e areglo ta cumbini ambos partido.
Nombracion di e Director di DVG a bay den un comision di reclutacion encabesa pa DRH durante un proceso di 1 aña largo, den cual Staring a sali como e miho candidato. Na januari 2016 el a asumi e funcion, pero a confronta resistencia di Minister Oduber, asina cu a asumi poder. Algun di e otro candidatonan cu a solicita pa e funcion a bay na disposicion di e Minister e tempo ey. A start un persecucion personal cu a desemboca den un relacion di trabou dificil entre Minister y Director.
Consecuentemente, e departamento a keda den man di un Management Team, forma pa Joan van Heyningen y abogado Sven Faarup. Despues di tempo Faarup a tuma su retiro y na su luga a nombra Judelca Briceño den e ekipo di maneho. E dosnan aki tey ainda, banda di Staring den directiva, un situacion masha inusual, pa cual Staring a busca pa Hues aclaria su posicion.
Mientrastanto e ambiente na pia di trabou den e departamento di mas o menos 180 trahado, a deteriora pisa. Demotivacion enorme y incertidumbre a percura pa un division entre e trahadonan, cu sin duda ta traduci den nan prestacion y funcionamento.
Gobierno awor lo mester evalua e opcionnan riba mesa, cu ta encera entre otro cambio di departamento pa Staring pero cu e mesun funcion y condicionnan laboral. Tambe por yega na un acuerdo di compensacion, loke na Ingles nan ta yama “Golden Handshake” pa Staring bandona su funcion den Gobierno. E ultimo lo no ta barata, pasobra Jerry ta hoben y tin hopi aña mas pa bay den e funcion aki.