Corte awe a tuma un decision den e caso sumario cu Romar Trading a entama contra Gobierno di Aruba, minister Glenbert Croes y Departamento di Labor (DAO), relaciona cu e decision pa no atende ningun peticion di retiro, pa motibo di pandemia. Hues a bari e decision di e mandatario for di mesa y na su luga a pone un multa cu por yega te na mey miyon florin si acaso e minister no cumpli cu e ordo aki!
Recientemente Romar Trading NV, representa pa abogado mr. David Kock, a entama un caso sumario contra Gobierno di Aruba, defendi dor di nan mesun departamento huridico. Awe hues mr. A. van de Leur a tuma un decision den e caso specifico aki, den cual e ta obliga gobierno pa den dos dia di tempo e corigi e decision robes cu minister a duna e director di DAO pa no atende ningun peticion di retiro den e ultimo lunanan aki.
Hues den e caso a repasa e ley, a atende e responsabilidad di comercio y e autoridad cu gobierno tin mara na ley, den cual e mester atende peticion di retiro y evalua, a base di argumentonan valido, si un negoshi por baha su cantidad di empleadonan of no. Abogado mr. David Kock, considera un experto riba leynan labora y docente du ley labora na Universidad di Aruba, a logra convence e hues contra e ponencianan di gobierno, cu pa motibo di pandema kier evita cu negoshinan ta kita hende di trabou.
E hues a considera cu gobierno, y den esaki specificamente minister Glenbert Croes, ta actuando contra ley y ta pasa riba derecho di e compania Romar Trading. Pasobra mesun cos cu e trahado tin derecho, gobierno tin derecho, asina e comerciante tambe tin un derecho universal di por haci un peticion. E actuacion y e ordo infunda cu minister Croes a duna e director di Departamento di Labor ta kita e derecho di e comerciante y den forma delibera, ta hinca comercio den un situacion fastioso y delicado pasobra entradanan a baha y gobierno ta forsa pa bo mantene bo gastonan igual.
Na final Corte a dicidi di:
- Ordena gobierno di Aruba pa, dentro di dos dia, duna instruccion na e director di departamento di labor, pa e trata e peticion di Romar Trading pa kita algun trahado y duna un contesta dentro di 12 siman, manera ley ta prescribi
- Den caso cu gobierno no cumpli cu e decision di corte, ta impone un multa di Afl. 5000,= pa dia of parti di dia cu no cumpli, te na un maximo di Afl. 500.000,=.
- Tambe a ordena pa gobierno mes paga gastonan di e caso, balora na Afl. 690 na corte y Afl. 1500 na gasto di abogado na e banda di Romar Trading.
Loading…
Reload document 
Open in new tab 
