Hues: Mester reinstitui Jerry Staring mesora den funcion di Director di DVG

Corte den caso di Empleadonan Publico (Gerecht in Ambtenarenzaken van Aruba) a tuma un decision den e caso cu Jerry E. Staring, representa pa abogadonan mr. David Kock y mr. E. Cafarzuza a entama contra Minister di Turismo, Salud Publico y Deporte, Dangui Oduber, representa pa abogado mr. Brian Coffie. E caso ta relaciona cu e decision di Minister Oduber, cu dia 12 di maart 2019, a ordena e Director di Departamento di Salud Publico Aruba (DVG) pa haci algun trabou na su disposicion pa un periodo di 12 siman. Durante e periodo ey e no por presenta na oficina di DVG y no ta den funcion di Director mas tampoco. Na su luga a instala un Management Team di 2 ehecutivo.

Desde october 2016 caba Drs. Jerry Staring ta den funcion di Director di DVG. Pero na luna di mei 2018, un empleado, Jayburtt Dijkhoff, como shopsteward di sindicato TOPA a skirbi un carta na Minister papiando di incertidumbre bou di trahadonan di DVG pa cu funcionamento di e Director. Riba dia prome di juni 2018, Minister Dangui Oduber, bou presion di sindicato y di un grupo di empleado, a opta pa prohibi entrada di Jerry Staring na DVG. Motibo tabata pa por a conduci un investigacion interno relaciona cu e acusacionnan y keho di empleadonan. Dos siman despues, dia 11 di juni 2018, Minister a dicidi di instala un “Management Team” desde dia 6 di juni 2018 na DVG pa tres luna largo.

Posicion di partidonan

E posicion di partidonan ta encera cu Staring kier su funcion bek y ta haya cu Gobierno ta mal uza e tempo mara den ley, pa constantemente sigui alarga e proceso pa tene for di su funcion. Di otro banda, Gobierno a bisa Hues cu ta evaluando pa kit’e for di trabou of busca un otro funcion pe den Gobierno pasobra nan ta convenci cu Staring no ta apto pa su funcion di Director di DVG. Minister ta teme cu si e regresa den su funcion, cu esey lo ta funesto pa e ambiehte na pia di trabou.

Consideracion di Hues

Hues a considera cu Jerry Staring tin un urgencia pa un decision pasobra aunke e no a bay atras financieramente, e hecho cu ta keda wante den un oficina separa sin nada di haci, ta daña su reputacion y su carera. E Magistrado ta considera cu pa awo e investigacion interno mester ta cla tambe, pasobra a haya suficiente tempo caba pa investiga, analisa y tuma un decision. Hues ta di acuerdo cu Staring tambe den e ponencia cu e hecho cu a dune un otro funcion mester te temporario y no por ta un forma pa keda wanta e empleado publico for di su funcion sin motibo valido. Hues a corda Minister Dangui Oduber cu dia 4 di februari 2019, ora cu a pidi pa prolongacion, a taha e mandatario cu e meste tuma pasonan concreto pa keda cla y pa respeta e posicon huridico di Staring. A opta pa no haci esey y toch prolonga e decision cu 12 siman mas.

Bisando esaki, Hues ta considera e di tres prolongacion como “onrechtmatig”. Bisando esey, ta suspende e decision y a bay di acuerdo pa manda Staring bek den su funcion.

Loader Loading...
EAD Logo Taking too long?

Reload Reload document
| Open Open in new tab

Download [231.92 KB]

Decision:

  • Hues a destrui e decision di dia 15 di maart 2019.
  • A bay di acuerdo pa bin cu un “voorziening bij voorraad”
  • Ta ordena Minister Dangui Oduber pa mesora permiti Jerry Staring drenta DVG pa sigui cu su trabou regular di Director
  • Ta dicidi cu e decision aki ta keda vigente te ora dicidi riba e “bezwaarschrift”.

Den e proceso tabatin varios bataya legal, di cual Jerry Staring a gana algun y Minister Oduber a gana algun. Pero awe Hues den caso di Empleadonan Publico, mr. A. van Suilen, a pone un punto final den e tantisimo batayanan legal, cu un sentencia fuerte den cual partidonan mester tene nan mes na dje y cumpli mesora, sin ningun opcion awor pa sigui alarga e proceso legal. Na final di e sentencia a stipula acerca cu “Ingevolge het bepaalde in artikel 94, lid 4, Landsverordering Ambtenarenrechtspraak staat tegen deze uitspraak geen rechtsmiddel open”. Bisando esey, Hues a pone un punto final na e batayanan constante y no ta duna opcion mas pa ningun apelacion di parti di partidonan y ta instrui pa manda Staring trabou bek y den su funcion di Director di DVG.

No por keda sin menciona e hecho cu Jabyurtt Dijkhoff, despues di a manda e carta contra Jerry Staring, a bay traha na disposicion (ter beschikking) di Minister Dangui Oduber.