E grupo cu ta maneha e localidad di Olde Molen, den oranan di anochi y marduga, a busca caminda legal pa cana. Den e ultimo dianan aki nan tabata basta den noticia, unda hasta autoridad, den e caso aki, a bay asina leu di cera e negoshi y esey ta suficiente motibo tambe cu e orario cu nan ta ahusta e negoshi di por hiba su maneho, no ta cuadra cu loke semper nan tabata tin.
Nan a bay den LAR y den e caso aki nan a haya bon noticia tambe. Demis Illes, abogado di Olde Molen, a haya informacion riba e decision cu LAR a tuma.
Abogado Illes a splica cu e cos a cuminsa cu na momento cu den mita di april, diripiente a aparece un decision di Gobierno anterior, cu lo corta e oranan di Olde Molen. Enbes di 3’or den siman ta bira 1’or y enbes di 6’or diasabra bay diadomingo, ta bira 3’or di marduga.
Esey a cay di sorpresa cerca e propietarionan. Mas of menos un luna despues por a nota tambe cu polis a cuminsa enforsa esaki y a bin cera Molen.
Consecuentemente e propietarionan di Molen no ta di acuerdo cu esaki. A busca caminda pa cana y a logra convence hues pa mira con esaki ta afecta Olde Molen cu ta un after hour club. E ta traha su ingresonan ora cu tur otro a cera y si sigui asina aki ta bay perhudica e luga. E caso tabata diahuebs. Ta un tipo di caso sumario, pero no uno tradicional. Hues den corte di LAR a para cuestion di orario pa e momento ey. Molen ta operando bek bao di su oranan bek, esta 3’or y 6’or.
Olde Molen
Por a tuma nota cu mas cu un biaha, autoridad tabata t’ey presente na Molen y hasta a detene e propietarionan den henter un investigacion cu tabata tin.
Oldrick Fernandes, e persona encarga di Olde Molen a splica cu ultimo tempo autoridad tabata basta activo riba dje y hasta a detene. Locual mester a haci, ta cana e caminda legal.
E ta sigui splica pa loke ta droga, no a sali nada afo. E ta haci su trabao di controla tur hende cu drenta p’aden y pa no tin nada di droga cu ta circula rond. Asina haya un persona cu ta haciendo esey, lo dun’e un blacklist y e lo ta pafo di e club.
E orario cu nan tin, tur hende conoce e luga como after. Practicamente nan ta warda tur e otro luganan cera, dj’ey nan ta cana bay Molen. Molen ta draai 80% riba turista. Tur e turistanan ta repeat guests y ta gusta e luga. Nunca no tin problema paden di e luga mes. E problemanan cu sa pasa ta mas tanto pafo.
Mensahe
Fernandes a comenta cu e no ta kere cu si e luga cera, problema ta caba. E tin e control paden. E mes ta maneha e bar y e mes t’ey tur anochi como bouncer. E ta manager tambe. E ta kere cu si polis haci su trabao parti pafo di e establecimento, e ora hunto lo tin un trankilidad tanto paden como pafo.
Awo ki pasa si cera tempran
Fernandes ta comenta cu lo haya mas problema otro caminda, pasobra ta haya e hendenan cu ta bay banda di beach. Eynan si bin problema, por yama polis, por pak aan e problema di biaha. Pero si bay banda di beach cu un problema cuminsa, con ta bay tin e control pa maneh’e. Polis no ta eynan. Esey ta loke cu Fernandes ta pensa.
Na Molen tin camara. Tur cos cu pasa ta graba y tur loke sosode nan por wak.
E decision
Fernandes ta super contento cu e abogado Demis Illis, kende a sa di para tras di e caso y a demostra nan e situacion con e ta en realidad. Tambe ta super contento cu e decision cu a tuma den e cas. Fernandes ta pensa cu e decision aki ta na su luga, pasobra e hecho ta perhudik’e.
E edificio di Molen mes no ta den funcion mas. E club paden no ta existi mas. E club cu tin ta pafo. Esey ta e bar nobo cual e ta opera. Paden no ta existi mas. E ambiente ta musica pafo y esnan cu kier bebe algo, ta pafo ta cumpra.
