Awe mainta Fiscal mr. Schwengle a presenta e caso penal contra Izaira y Xiomara Mansur dilanti Hues Comisario pa su decision. Ministerio Publico a pidi pa prolonga e detencion cu 8 dia mas y Hues Comisario a aproba e peticion. “Pero mi no ta kere cu nan lo wanta nan cera. Mi ta spera cu pa awe tardi mes nan ta sali caba”, asina nan abogado, mr. Chris Lejuez, a bisa nos un rato pasa.
Ayera mainta 11:00am a sosode un caso di destruccion na un cas situa na Opal # 48. Na un prome instante a papia di atraco, pero na caminda a bisa cu hendenan lo a yega e cas pa bringa cu e habitante. A resulta cu mayornan di un mucha muhe a bay atende cu un homber di edad avansa cu ta bacila nan yiu via Facebook. Sinembargo, den e proceso a destrui su propiedad, cu a pone cu Polis a detene ambos y Fiscal Auxiliar a ordena nan encarcelacion, por lo pronto pa dos dia.
Abogado mr. Chris Lejuez, kende ta encarga cu nan defensa, a splica nos cu e acusacionnan contra e pareha Xiomara y Izaira Mansur ta destruccion y maltrato simpel (eenvoudige mishandeling). De facto, nan a djis destrui un glas di e bentana di cas di Vinck situa na Opal. Awe a haya chens toch pa splica e Fiscal mas detaye di e caso, pa e no mustra djis cu dos mayor a yega destui propiedad di otro of menasa e homber ” por nada”. Claro cu esun no ta hustifica e otro, pero si Fiscal tin un miho bista di henter e caso, e ora lo por compronde con un mama lo reacciona contra un homber “perverso” asina.
Parce cu no ta e biaha aki so e homber Marshal Vinck a manda mensahe pa su yiu bisand’e cu e tin un “cute face” sino cu desde dos luna pasa caba a cuminsa mand’e diferente mensahe, entre otro cu su cara ta tristo siendo cu “shelter in place” a pasa caba. E hoben a puntr’e ken e ta pasobra e no conoce, pa cual e homber a contest’e cu e ta “un hende nechi”. Ta tipo di bacilonnan pa mira si e hoben ta cay den su “trampa”, pero al contrario, el a haya e mayornan rabia riba dje pa puntr’e kico ta su plan cu nan yiu muhe.
Abogado mr. Chris Lejuez ta kere cu a prolonga e detencion pa un interogacion mas cu falta. Aunke e no por confirma, pero e ta kere firmemente cu lo laga ambos sali awe ainda, sino mañan trempan. E mes no ta mira motibo pa tene un mama rabia cera pasobra el a sali na defensa di su yiu muhe, cu apenas a cumpli 18 aña di edad.
