Hues Comisario a prolonga detencion di Gario

E cantante Ashrock Gario a tende di Hues Comisario cu e por keda 8 dia mas cera, pendiente e investigacion den su contra. Dia 20 di mei ultimo Fiscal a pidi Hues pa want’e cera ainda pa motibo cu no ta cla ainda cu e investigacion, cu ta encera cu el a tene relacion sexual cu un mucha di 15 aña bayendo EPB School.

E caso a mira luz di dia ora cu e mucha muhe menor di edad, cu awor tin 16 aña, a bay bringa cu e pareha di Ashrock Gario y a cort’e na su cara. Polis a detene e mucha muhe y a cer’e mesora pa maltrato cu un arma. Ta durante su detencion cu mayornan a dicidi di keha e homber cu tabatin relacion cu nan yiu muhe, siendo cu e no tin edad pa tal. E mucha muhe tambe a confirma na Polis cu Gario ta su “guy”.

E investigacion ta den man di Jeugd en Zeden Politie. Den pasado caba un otro figura conoci den comunidad a pasa den un situacion casi similar y a haya castigo di prizon, debi cu tabatin un relacion sexual cu un menor di edad. E tempo ey a bisa cu e mayornan di e mucha tabata na altura. Ley no ta laga opcion habri pa ningun circunstancia; ta bisa cu tene relacion sexual cu un mucha di 16 aña of menos ta castigabel pa ley. Sea cu e mucha mes kier of no, abo como adulto ta responsabel!

Comments

comments