Apesar cu Corte di husticia ta haya cu e expresionnan haci door di Parlamentario Benny Sevinger (AVP) contra di Rocco Tjon (MEP) uzando e palabra pedofiel no tabata proba, toch no a bay di acuerdo cu su peticion pa ordena Sevinger pa rectifica ni paga multa ni nada! Hues ta haya cu Tjon, siendo politico, mester por maneha critica.
Hues a tene cuenta den su sentencia cu e expresion haci durante un conferencia di prensa y transmiti en bibo no a keda noticia pa mucho dia tampoco. Tjon a pidi pa Sevinger rectifica den e media mas grandi di Aruba, 24ora.com y den e medionan mas chikito, esta e corantnan Bon Dia Aruba y Diario. E peticion di Rocco Tjon pa prohibi Benny Sevinger pa sigui yam’e pedofiel den futuro tambe Hues a rechasa. Hues ta haya cu esaki lo limita e politico den su derecho pa expresa su mes, esta cu e lo limita Sevinger den su derecho di expresion.
Corte a bisa tambe cu aunke loke Sevinger a bisa no ta basa riba berdad, toch e ta bisa cu e no ta bay demasiado leu den su expresion pa bisa cu e ta ofensivo y loke cu un figura politico y publico, mester por soporta e tipo di acusacionnan cu ta wordo lansa contra nan.
Apesar cu a dicidi cu Tjon tin rason di loke cu Sevinger a bisa no ta cuadra cu berdad, toch e no a dicta na su fabor y a rechasa tur su 4 demandanan. Ambos politico mester paga nan mesun gastonan.
E Parlamentario a reacciona mesora bisando cu e ta contento cu Hues a considera e acusacionnan di benny Sevinger contra dje como “onrechtmatig” y sin prueba. Sinembargo, e lo warda pa otro siman pa e haci un declaracion oficial y pa e duna mas informacion na pueblo pa e acusacionnan di “pedofiel” cu opositornan ta acus’e di dje.