Hues a laga sospechoso di violacion sexual liber

Dairon Richardson no por a contene su sentimento di alegria despues cu Hues a inform’e cu e por bay cas. Bay cas despues di a keda casi 5 luna cera den KIA acusa door di un mucha muh’e di violacion.

Dairon for di inicio a declara cu e no a comete e hecho di cual e ta wordo acusa. Tin declaracion tanto na su fabor como contra. Tin amigo cu ta bisa cu Dairon semper a bisa cu e no ta gusta muchanan menor y otro ta bisa cu e lo por tene relacion si e victima, si esaki pidie. E ta nenga di a bisa e ultimo aki.

Polisnan a detene na momento cu e denuncia a wordo haci na januari ultimo door di e menor y su mama.

E informacionnan den e rapport ta bisa cu dado momento momento e mama a mira su yiu cu un marca na su garganta. Mesora el a cuminsa interogue si e tin un guy. Despues di un rato e mucha muhe a admiti. Cu e siguiente pregunta, e caso a cuminsa lora. E mama a puntr’e si e tabatin relacion cu su guy y el a nenga. Pero e mama no mucho convenci, a bis’e cu e ta hib’e dokter pa haci un examen. Aki ta caminda cu e menor a basha’bou bisando cu el a wordo “viola” un aña pasa door di Dairon. Motibo pa e mama dicidi di mesora acudi na Recherche pa haci un denuncia.

Esaki ta loke cu a causa duda den e caso aki, e actuacion laat, siendo cu ta parce cu e mama y e wela tabata na altura di algo pasobra un testigo a adverti nan un aña pasa caba cu el a mira e acusado y e mucha muhe menor sali for di un cas bandona. Y toch, nan no a haci nada pa averigua kico ta pasando.

Segun e acusacion cu Ministerio Publico a trece contra dje ta cu na januari, 2018 el a viola un mucha muhe of tabatin relacion intimo cu un mucha muhe cu no tabatin 16 aña ainda.

Den Corte e acusado a keda insisti cu e ta inocente. Hasta el a pasa e berguensa di admiti di tin un malesa transmiti sexualmente, pa ilustra cu e no por tabatin relacion cu e mucha muhe, pasobra e ora e menor tambe lo tin e malesa aki. El a keda sorprendi ora cu Fiscal a bira contesta cu berdad e menor tin e malesa aki. Y cu el a cuminsa sinti esaki un siman despues cu e hecho a tuma luga, pero no a bay dokter, por lo menos no mesora. “Mi no ta bay conta algo bochornoso pami si mi ta sigur di mi mes cu mi no a tene relacion cun’e,” el a splica Hues.

E no ta nenga cu e sa combersa cu e mucha muhe y hasta e biaha cu nan a bay combersa na un cas na Weg Fontein. Pero tabata pa papia di e guy di e mucha muhe. Alabes, el a bisa Hues, e testigo por a mira cu “mi no tabatin e mucha muhe wanta, e no tabata yora, y nos tabata cana trankil hunto”.

Fiscal den su rekisitorio a bisa cu ta hopi dificil pa yega na prueba den casonan asina. Tin denuncia di e victima y e acusado di su banda ta nenga. E mucha muhe, kende a bisa cu el a cuminsa saca fluho algun tempo despues di e relacion cu e acusado, a bay dokter pa test te un aña despues. Den e caso di e testigo, el a bisa cu el a mira nan sali for di patras di e cas, pero e no por bisa nada di e sucedido mes, esta si tabatin relacion of violacion. Ta wordo bisa den e rapport cu na october, 2017, e testigo lo a conta e mama y wela di e mucha muhe kico a pasa, siendo cu e hecho supuestamente a tuma luga na januari, 2018. Pues e fechanan no ta cuadra cu otro. Pa e motibo aki el a pidi Hues pa declara e acusado liber di e acusacion.

Hues a cera tratamento di e caso y a dicidi di dicta sentencia mesora. El a bisa cu den e caso aki no tin prueba suficiente pa condena e acusado. Un aña despues ta bini cu un declaracion di dokter. Segun por a compronde, e testigo a conta e mama kico el a mira mesora, pero e no a haci nada. Banda di esaki, no tin ningun “steun bewijs” tampoco. Pa tur e motibonan aki a declar’e liber y a orden’e pa e wordo laga liber e mesun dia.

Comments

comments