Hues mr. Debby Angela a confirma awe mainta cu el a kiboca su mes ayera durante e entrevista exclusivo cu 24ora.com relaciona cu e tema di casonan di abuso sexual. E Magistado a compara e castigo maximo pa casonan di inmoralidad entre Aruba y Corsou, di cual el a bisa cu na Corsou e ta 24 aña y na Aruba e ta apenas 12 aña, indicando cu Corsou ta dobel di Aruba. Awe el a informa nos cu esey no ta cuadra.
Hues Angela a aclaria awe cu ora e Codigo Penal nobo (Nieuw Wetboek van Strafrecht) a drenta na vigor, a baha e castigo maximo pa casonan di inmoralidad na Corsou. Na Aruba actualmente abuso sexual cu un mucha ta 12 aña di edad, por haya un castigo maximo di 12 aña, mientras cu na Corsou e ta 15 aña. Parce cu Parlamento, den e cambionan cu a haci siman pasa, a vota na fabor pa Aruba aumenta e castigo mesun cos cu di Corsou tambe, esta 15 aña pero esey no a drenta na vigor ainda. E mester cana su caminda prome cu yega na e publicacion. No ta conoci cuanto tempo e lo dura. Na Corsou, a trat’e den Parlamento apenas na september, 2019 (e cambio di castigo) y a drenta na vigor e aña’ki. Esey ta e motibo cu no tabata na altura cu el a keda publica caba na hermana isla.
