Hues a dicta: Drs. Jerry Staring a recobra tur autoridad como Director

Awe mainta Corte den casonan di Empleadonan Publico (Gerecht in Ambtenarenzaken van Aruba) a dicta sentencia den e caso entama dor di Drs. Jerry Staring, director di Departamento di Salud Publico (DVG) contra Minister Dangui Oduber di Turismo, Salud Publico y Deporte. E director a conta cu abogado David Kock den su ekipo di defensa mientras cu Gobierno a huur abogado Brian Coffie pa defend’e. Hues mr. M. de Haseth a dicta na fabor di Staring awe, indicando cu tur e peticionnan y demandanan di e Director di DVG ta sostenibel!

Cu e sentencia di awe ta bin un fin na un proceso largo di batayanan legal entre Gobierno y e Director di DVG. Ta un bataya cu a start algun siman despues cu Minister Dangui Oduber a asumi e funcion di Minister. E proceso a bay largo y costoso, pasobra tabata un caso despues di e otro, apelacionnan, protestanan y asina por sigui menciona. Corte a uni tur e casonan hunto y a dicta un solo sentencia awe, den cual el a destrui e decisionnan cu Minister Dangui Oduber a tuma contra Staring pa kita su autoridad den e funcion di Director di DVG.

No ta conoci si e mandatario lo apela e decision cu el a haya awe den Corte. Hecho ta cu a tuma nota cu den e crisis di hacking di e sistema di computer di Dr. Horacio E. Oduber Hospital a uza e mesun Staring na cabes di e comision di calamidad. Asina tambe a nota presencia di Staring den e ekipo di crisis di Coronavirus. E ta lanta e pregunta: Si Staring no ta capas pa maneha DVG, dicon e ta capas pa encabesa un crisis si? Ta obvio cu Corte tambe a tene cuenta cu esaki y no por a kita for di e pensamento cu tras di e persecucion aki tin politica meti tambe.

Jerry Staring

Jerry Staring a studia pa “verpleegkundige” na nivel HBO, pues a haya su “bachelor in nursing”. El a specialisa den psikiatria y a core stage den Dr. Horacio E. Oduber Hospitaal na Aruba. El a caba su estudio na aña 2002 na Hoge School Arnhem-Nijmegen. Mesora despues el a cuminsa su carera como nurse na PAAZ, mientras cu na final di aña 2003 el a bay traha na Psikiatria Ambulatorio bou Directie Volksgezondheid Aruba.

Den un esfuerso pa prepara su mes miho pa un puesto den liderazgo, el a opta pa sigui studia na Universidad di Aruba, den e facultad di “Arts & Sience” cu e tema specifico di “Social Work & Development”, brinda den cooperacion cu Universidad di Puerto Rico y Vrije Universiteit van Amsterdam. Na aña 2011 el a caba cu su estudio na nivel “Master” riba maneho di cuido medico. Cu e diploma ey den su man, el a cambia di trabou y for di SPD a opta pa cuminsa un carera nobo como “Beleidsmedewerker” na Directie Volksgezondheid. Na fin di aña 2011 el a traha na FCCA como “Stafmedewerker Integraal Opbouwwerk”.

Cu e conocemento, experencia y educacion obteni, entre 2011 pa 2013, Jerry Staring a fungi como “Gastdocent” na Universidad di Aruba, den e facultad di nivel Bachelor den “Social Work Development”. Na October aña 2014 el a cuminsa den e funcion di Presidente di e Management Team di Directie Volksgezondheid y dos aña despues, na october 2016, el a bira e Director nobo di DVG, despues di un proceso transparente y largo, bou auspicio di Departamento di Recursonan Humano (DRH) di Gobierno, pa busca un lider pa sigui maneha e departamento cu ta di vital importancia pa nos pais.

Jerry Staring a nace na Hulanda, su mama ta Arubiano di Socotoro, su tata un Hulandes-Europeo pero cu a traha como docente pa hopi aña na Aruba. E mes ta e unico ruman cu a nace na Hulanda. E tin 2 yiu muhe, un di 10 aña y otro di 11 aña di edad.

Loader Loading…
EAD Logo Taking too long?

Reload Reload document
| Open Open in new tab

Download [5.81 MB]