Hues ta compronde cu SADA ta rabia y a laga nan welga te mainta

Hues mr. Sap a tuma diaranson casi 6’or di atardi a dicta veredicto den e caso cu Minister di Finanza, hunto cu ATIA y KVK, a cuminsa contra SADA pa e welga cu nan a drenta den oranan di mainta. Un decision unda cu el a balansa e interes di e sindicato SADA y su miembro di un banda y interes di Comercio di otro banda, mientras cu den caso di Gobierno el a cuestiona e seriedad di nan actuacion.

“Mi por compronde cu e miembronan di Duana ta rabia. Pero tambe mi kier bisa cu den e caso aki mi no ta dicidi kende tin rason of no den e problema aki, pasobra un caso sumario no ta duna espacio pa esaki,” Hues mr. Sap a cuminsa pa splica.

Huez a dicidi riba futuro di Welga di Aduana

Posted by 24ora on Wednesday, September 11, 2019

El a splica e partidonan cu mas pisa e herment uza, mas cuenta mester tene cuenta cu e efectonan cu esaki (den e caso aki e welga) tin riba tercer partido. Den caso di un welga, e Magistrado a sigui bisa, controlnan no por tuma luga, y containernan tampoco ta wordo procesa. P’esey pa haci uzo di un herment pisa den un periodo cortico, di anochi pa mainta, mester ta hopi mas cauteloso den algo asina.

Di otro banda mr. Sap a bisa tambe mirando e trayecto largo cu a wordo tuma den e caso aki, Gobierno a crea cierto impresion cerca e sindicato y su miembronan. Esaki ta pone Hues puntra: den un caso asina, ki balor por duna e ora den un acuerdo cera cu Gobierno. Sinembargo e no por bay trata esaki den un kortgeding pero ta un tema pa un otro tipo di procedura.

Evaluando e herment di welga, el a bisa cu aunke e ta compronde cu e sindicato y su miembronan ta rabia, esaki no por dura di un forma indefini. “Mester limita e tempo. No mester lubida cu e ta un herment cu ta uza pa yega na algo y si uza e herment aki, bo mester tin e disponibilidad pa sinta na mesa y papia,” el a splica. Teniendo cuenta cu esaki el a dicidi cu e sindicato por sigui cu su welga te cu diahuebs mainta 6’or. Despues di esaki mester reanuda trabou y pa cada dia of parti di un dia cu esey no sosode, por cobra nan un multa di 100 mil florin.

Tambe el a pone un “cooling off period” den cual periodo e partidonan mester trata di sinta na mesa y yega na un acuerdo. Den e periodo di un luna aki, cu ta vence 12 di october, SADA no mag yama ningun welga.

Pa loke ta e otro demanda di e sindicato, pa ordena Gobierno pa paga nan e suma palabra, esaki no ta algo cu Corte por obliga Gobierno na haci den un procedura di caso sumario.

Pues awo ta keda na Gobierno, kende ta responsabel pa mantene situacion calmo na Aruba, pa yega na un palabracion cu e sindicato.

Comments

comments