Corte di Empleadonan Publico a dicta na fabor di Director di Departamento Meteorologico Aruba, drs. Marck Oduber, den un caso cu el a entama contra Minister Chris Romero. Cu e caso aki, Gobierno mester debolbe e dos simannan di vakantie cu e Minister a obliga e ambtenaar di tuma. Den e sentencia Hues ta cuestiona e forma di tuma decision di Minister Romero, den cual ta aplica leynan robes y ta perhudica un empleado publico di forma premedita.
Dia 23 di februari 2018, e mandatario a manda Marck Oduber cu vakantie obligatorio di dos siman. Dia 15 di maart el a protesta contra e decision y dia 10 di september Corte a trata e caso. Awe dia 29 di october 2018 Hues a destrui e decision di Minister Romero y a ordena Gobierno pa paga gastonan di e caso tambe.
For di momento cu e Gobierno aki a asumi poder, campañadonan di Minister Romero trahando den e departamento a cuminsa un guera interno contra e Director Marck Oduber. Nan empeño na dado momento a logra, ora cu nan e Minister a scoge pa e grupo chikito aki y a obliga e Director pa bay cas cu vakantie obligatorio pa por reina paz bek den e departamento.
Pa straño cu e por zona, mientras cu pa Minister Romero e profesional Arubiano aki no ta sirbi pa e trabou, su mesun colega, Minister dr. Rudy Lampe si ta kere den Marck Oduber y a tum’e den su Ministerio pa conseh’e riba proyectonan specifico. Di otro banda, Departamento Meteorologico ta sigui sin un Director.
