Hues a declara Doodle Sophia liber di tur acusacion

Awe mainta Corte di Prome Instancia a declara Pastoor Doodle Sophia liber di tur acusacion, esta di cu e lo a mishi cu pecho di un mucha muhe cu tabata asisti na e Scol Tra’i Merdia di su Iglesia na aña 2016. Despues di tres aña di investigacion y batayanan legal, awe Hues a conclui cu e pruebanan no ta suficiente. Tur informacion ricibi ta bin di un angulo so, esta e mucha, e mama y e tata. A constata tambe cu Recherchenan no a interoga ningun leidster di e scol Tra’i Merdia.

Ley ta stipula cu pa un denuncia asina mester tin “steun bewijs” cual no tin den Procesverbaal di e caso aki. Di e forma aki no por yega na un castigo. Abogado Rossi Marchena a defende Doodle Sophia den e caso aki.

E acusacion
E acusacion tabata cu na aña 2016 e lo a drenta un camber unda un mucha muhe di 10 aña tabata sinta ta wak TV. Segun declaracion di e mucha na su mama, e Pastor a mishi cu su pecho y despues a pidie habri su carson pero el a nenga. Tambe e mucha a declara cu Pastoor Sophia tabata yam’e su casa chikito. Pero e Pastoor ta bisa cu nada di esaki ta berdad!

“Mi ta homber di Dios”

Nos a entrevista Doodle Sophia tres aña pasa caba y e tempo ey a bisa nos cu e ta un storia largo. Polis a cay aden y a haci nan interogacion. “Agentenan policial a haci nan pregunta y como homber di Dios bo ta contesta cu e berdad. Sociedad conocemi asina y asina mi ta.” Un homber di Dios ta depende riba Dios. E daño ta haci caba.

Na final el a declara cu Cristo Hesus a wordo acusa di falsedad mil biaha mas grandi cune. Loke Cristo a haci ta keda keto. Sophia a opta pa keda keto, pero el a haya presion. Tabatin recogemento di firma e tempo ey y Sophia ta puntra su mes, pa ki motibo. A bay tur radio emisora, bay tur canal di television, a skirbi hopi den corant pa daña su nomber. E tabata convenci di laga e asunto den man di Señor, cu awe a obra na su fabor!