Hues a confirma retiro di Polis cu a maltrata pareha y amante

1869

Recientemente tabatin veredicto den caso di ambtenaarnan di e Polis, Jonathan Cornes, cu a entama un caso contra su retiro for di Cuerpo Policial. E ta haya cu e retiro no tabata husto, si comprar’e cu otro casonan. Pero Hues no a mira e caso mescos cune y a confirma e decision di Gobierno pa otorga su retiro como un medida disciplinario.

Dia 5 di mei di 2017 el a haya “eervol ontslag”, cinco dia despues cu Gobernador a firm’e. E ex Polis a entrega obhecion y e caso a wordo trata na maart di e aña’ki y a finalisa cu su tratamento dia 7 di mei ultimo.

Motibo di su retiro inmediato ta cu el a faya barbaramente cu su deber. A start un investigacion penal contra dje, sospecha di maltrato di su pareha y intento di asesinato, maltrato, menasa, robo y destruccion cometi contra su colega femenino di fam A., anto den Warda di Polis. Cu e comportacion aki e Polis en cuestion a daña integridad y imagen di dje y di Cuerpo Policial di Aruba severamente.

Den Corte a subraya e hecho cu ta pone un standard halto pa integridad y confiabilidad pa Polisnan. Hues ta sinti cu el a causa daño na integridad y confiansa di tanto Cuerpo di Polis, pero tambe di Gobierno di Aruba y como tal no ta apto pa haci e trabou aki mas. Specialmente pasobra el a comete e actonan aki den su funcion como Polis y a hay’e culpabel di maltrato intencional di tanto su amiga como su colega femenino y hasta a haya castigo di prizon di un luna.

Corte ta di acuerdo cu a firma su retiro pa motibo cu el a faya pa cumpli cu su deber y cu el a causa daño serio na imagen di Cuerpo Policial Aruba. Ta considera loke el a haci algo hopi serio, mas ainda pasobra e tabata un funcionario policial. Un Polis mester duna ehempel, ta pone exigencianan halto na nan pa loke ta integridad y confiabilidad. Su hefe tabatin tur motibo pa dun’e su retiro.

No por papia di discrepancia entre e castigo imponi y e infraccion cometi. Ademas no a acepta e argumento di “gelijkheidsbeginsel” pasobra no tin casonan similar den cual a tuma otro decision. Y e casonan cu el a menciona no ta mes serio cu esun di dje, o sea cu e fayonan cometi ta mas serio di esun di dje.