Hues: A bira tempo pa caba cu persecucion politico

E caso sumario awe di Fundacion Lotto pa Deporte (FLPD) a conta cu un sala bastante yen di abogadonan, studiantenan di ley di Universidad y di ciudadanonan interesa pa sa con Corte ta mira e decision di Gobierno pa retira e Hunta di Supervision di FLPD. E Hues awe a duna su comentario na mas di un ocasion den Corte, specialmente ora a bisa cu cambio di directivanan ta “custumber” of hasta e ta den nos “cultura”.

Hues mr. Sap a puntra abogado mr. Anthony Ruiz, cu si e mes no ta haya cu ta tempo pa caba cu persecucion politico na Aruba, cu despues di cambio di signatura di un gobierno pa e otro, cu mesora ta core kita tur e miembronan di directiva di e fundacionnan of companianan priva di Gobierno. E abogado a splica cu na aña 2009 e Gobierno di AVP a haci mesun cos. E Hues a puntra si ta asina lo mester sigui tambe, den cual ta keda persigui hende pa motibo di nan color politico.

Na momento cu a splica e Hues cu den e area aki di Reino Hulandes, referiendo na e islanan Aruba, Boneiro, Corsou, St. Maarten, Saba y St. Eustatius, ta algo masha normal y ta forma parti di e cultura politico, cu e Gobierno nobo ta cambia tur e directivanan di “su” hendenan, cu Hues mr. Sap a bisa cu el a papia cu otro Huesnan den Reino y ta bou di e impresion cu na Aruba e asunto aki ta mucho mas serio compara cu tur otro isla.

E Hues a bisa cu mester yega na un formula unda e directivanan ta traha pa pais Aruba y no pa Partido AVP of pa Partido MEP. Asina ta caba cu e fenomeno di persecucion politico despues di cada eleccion y cambio di gobernacion.