Awe mainta Corte di Prome Instancia a dicta sentencia den e caso penal contra Marvin Stennett, kende tabatin tres acusacion pisa contra dje. Hues a hay’e culpabel di tur e acusacionnan, aunke cu el a nenga di a tene relacion sexual forsa cu e tres hende muhenan aki. E acusado a insisti cu tabata sex consenti, pero Hues no a kere su storia y a conden’e na 6 aña di prizon, aunke cu Fiscal a pidi 10 aña di castigo p’e.
Desde crisis di Coronavirus, Corte a adapta su sistema di funciona y awo den e normal nobo por a nota cu no ta trece acusadonan Corte pa scucha nan sentencia. Esaki ta sosode na KIA mes, mientras cu e Hues ta sinta den Corte y ta comunica via di video-call cu ne pa inform’e e decision.
Ministerio Publico a acusa Marvin Stennett di:
- Posesion di material pornografico di su yiu muhe menor di edad
- Di a tene relacion sexual cu su casa hunto cu su dos yiunan homber na momento cu e señora tabata inconsciente
- Violacion di e mucha muhe F. Sanchez.
“Mi ta hayabo culpabel di tur e acusacionnan aki,” Hues a bisa e acusado.
E Magistrado a splica e acusado cu e declaracionnan den e caso di F. Sanchez ta igual. Pues no tin diferencia den loke nan ta trece dilanti di loke a pasa cu ne, kico el a conta nan compara cu loke e mes a declara na Polis. A papia di e estado emocional den cual e victima tabata na momento cu Polis a papia cu ne. Pero tambe loke a pasa e anochi ta cuadra cu loke e mesun acusado a bisa. E unico cos ta cu e acusado ta interpreta e sucedido como sex consenti, mientras cu e victima a bisa cu explicitamente el a bisa NO. Pero pa miedo y el a sinti su mes intimida e no por a haci nada te ora cu e tabata su so y tur cos a cuminsa pasa bek den su mente.
Pa loke ta loke el a haci cu su mesun casa, tambe a keda proba. Den su telefon a haya un video unda por mira e dos yiunan di e acusado y e acusado mes ta tene relacion sexual cu señora di inicial C.C., kende a momento ey tabata casa cu Marvin y madrastra di e dos yiunan di e acusado. Por a mira tambe riba e video cu e señora no tabata na tino y no tabata reacciona. Pues e tabata completamente inconsciente.
Den su celular tambe a haya potret y video di diferente parti di curpa di su yiu muhe, kende tabata menor di edad. Potretnan tambe unda e ta haciendo cierto “pose” sexual y saca potret di esaki.
Hues a mustr’e riba trauma pa tempo largo cu victimanan di violacion sexual ta keda cu ne.
Mirando e acusacionnan Corte a dicidi di impone un castigo di 6 aña, cu ta 4 aña menos di loke tabata e demanda di Ministerio Publico. Tambe Hues a bay di acuerdo cu peticion di e victima pa un compensacion di daño y perhuico di Afl. 12.000,=.
Mester menciona cu mama di e victima, di fam Sanchez, tabata hopi rabia y emociona pafo di edificio di Corte. Cu awa na wowo el a bisa nos cu e violado di su yiu muhe a haya 6 aña so di prizon. De facto, si kita e tempo di “bon conducta”, cu e violado aki lo sinta 4 aña so den prizon, mientras cu Fiscal tabata kier a cer’e pa 10 aña.
Ambos banda tin dos siman di tempo pa apela e decision. Abogado mr. Chris Lejuez no a logra papia cu su cliente ainda pa scucha kico e ta pensa di e castigo. Durante tratamento di e caso e acusado a nenga tur e acusacionnan.
