FTA ta representa un grupo grandi di trahado na CITGO. Hubert Dirksz, presidente di e sindicato a splica cu berdad e trahadonan ta bao di un presion enorme y tanto sindicato IOWUA y FTA despues a reuni cu director di CITGO, caminda cu el a informa cu e lo percura cu tur cos lo keda trankil y lo cumpli cu e trahadonan y cualkier informacion cu tin e lo pasa pa e trahadonan.
Sinembargo, loke ta keda un pregunta ta e intencion despues di a firma e MoU, ya cu lo a keda pa caba di delibera y firma e Suspension Agreement. E Suspension Agreement ta pa nada mas confirma e intencionnan cu tin den e MoU.
Pa loke ta e Suspension Agreement tur hende sa cu esaki ta pa CITGO traslada tur propiedad pa RdA. Unabes cu pasa e propiedad, e trahadonan automaticamente tambe ta pasa over. Basa riba ley cu tin di traspaso, di mes e compania cu tuma e operacion over tin cu paga e trahadonan tambe, esta sigui paga nan salario. Si en caso mester retira algun hende, haci e cantidad di empleadonan menos, esaki ta basa riba kico lo bay pasa cu e compania. E ora ey esun cu mester paga, ta esun cu na e momento ey tin e operacion. Tur hende ta consciente cu e situacion financiero di RdA no ta suficiente fuerte pa carga e peso ey. Pero legalmente CITGO no ta mara na esey. Basa riba su bon boluntad e lo por dicidi pa cubri e parti eynan. Pero FTA sa cu di parti di gobierno, masha poco a haci te asina leu cu nan ta na altura di dje. Tin varios luna ta pidiendo reunion, pidiendo informacion di gobierno y no ta hayendo informacion.
Kico esaki lo trece cun’e?
Esaki lo por resulta cu na cierto momento e trahadonan ta dicidi cu no por wanta mas y ta bay den accion. Esey lo por tin consecuencianan hopi serio pa pais Aruba. E sindicato ta compronde y no kier haci ningun daño, sigur na pais Aruba, pero no ta manera pa trata cu trahadonan. FTA ta spera cu di parti di gobierno, tin decisionnan y tin cu ta informa di esaki.
Speransa
FTA en principio a pidi pa negociacionnan tuma luga, pero cu tur partido na mesa. Tanto di parti di gobierno, di parti di IOWUA, FTA y tambe RdA y CITGO, pa di e forma ey conhuntamente tuma decision, wak kico ta bay pasa. Eynan, segun Dirksz, mester basha awa den biña pa tur hende sali satisfecho y cu e trahadonan, ta central manera cu Gobierno ta bisa.
Kico FTA ta sinti
FTA ta sinti cu tin obstaculo. “Kisas tin otro intencionnan cu cierto momento cu no por cumpli cu loke CITGO ta pidi y esey ta stroba pa yega na firma e Suspension Agreement. Nos sa cu cierto momento tin cu haya un operador. Mester tin un operador pa e trabaonan continua y esey te aworaki ta mira cu no ta e caso. Si bin un operador mes, mester bin un operador serio. Ta laga hende pensa cu no tin operador, of tin operador cu no sa di nan. Sea cu nan ta operador fantasma.” FTA ta kere cu mester ta cla si tin operador of ta desmantela. E ta haya cu no por specula, pero door di e tardansa, FTA ta specula. Ta kere cu esey no ta e manera corecto. Mester sinta na mesa y papia seriamente. Gobierno ta parce cu sea tin informacion y no kier duna, of e no tin informacion at all y ta falta pa bin na mesa e ora, pa delibera. FTA kier aporta pa yega na un solucion, segun Dirksz.
Trankil of no?
Awor aki, basa riba palabracionnan di CITGO, FTA ta kere cu e salarionan lo t’ey. CITGO ta un compania grandi y poderoso. Pero sa tambe di e situacion cu tin na Merca, e situacion di embargo riba tur loke ta transaccionnan y translado di petroleo, cu ta haci e situacion dificil pa e operacion. Pero FTA ta spera cu esaki tambe por haya un solucion. E persona of e actor mas responsabel pa yuda den soluciona e problema aki ta gobierno y gobierno mester tuma esaki como prioridad.
Aruba tin un situacion financiero dificil. Si por soluciona e asunto di e refineria, e ta un ayudo pa e situacion financiero di e pais. E sindicato no por compronde mas. E ta hiba cu FTA no ta descarta cu den un ora pa otro lo tin un paro di e trahadonan.
Un paro
FTA kier salba pan di su miembronan. FTA ta kere den esey. E trahadonan tambe ta kere den esey. No mester papia di perdida di trabao. Tin cu papia di continuacion di trabao. Si na cierto momento, pa motibo di cambionan di compania of operacion, mester termina relacion di trabou cu algun trahado, ta paga nan corectamente. Pues manera ta para den e acuerdo y loke cu a paga esnan cu a bay prome cu nan.
