For di september 2017 e hala hubenil di partido AVP esta HAC a haya un preocupacion enorme na momento cu a tuma nota di un gobierno nobo y rencoroso.
E pueblo a hañe confronta cu un gobierno cu a engaña,defrauda y desapunta e pueblo Arubano. Awe e preocupacion den nos organisacion ta mas ainda, na momento cu nos a mira cu awor kier silencia e pueblo su desapunto y disgusto.
Mas preocupante pa nos ta, cu ta haci e tipo di intimidacionnan aki por medio di persecusion politico y maluso di poder hudicial.
Nos como hoben ta consciente di cada paso cu Gobierno ta tuma contra ciudadanonan pa motibo di nan color politico.
Recientemente periodistanan, cual 1 di nan ta forma parti tambe di nos Hubentud, a bira e siguiente victima di e racha di intimidacion y persecusion. Pa e rason aki, no lo ta un sorpresa cu e dia di mañan ta nos mesun hobennan ta e siguientenan pa ta victima di un dicho Gobierno.
Ta pesey HAC ta para firme pa nos derechonan fundamental, derechonan humano y ta compromete nos mes pa conscientisa cada mucha y cada hoben cu ta biba na Aruba cu nos como boso representante lo defende y sigui analisa masha di serca e situacion fastioso y preocupante aki como cu nos ta convenci cu; peligroso ta ora cu un pueblo tin miedo di su propio Gobierno.
