Hospital: Tres dia mas den calamidad!

“E crisis cibernetico na dr.Horacio E.Oduber Hospital a drenta su di 11 dia. A maneha e ultimo 72 oranan conforme ley door di un decreto gubernamental anuncia diaranson ultimo laat anochi. Team di maneho di Calamidad Nacional despues di evalua e situation yegando e 72 ora, hunto cu Minister President Evelyn Wever-Croes a haya necesario pa bin cu un decreto gubernamental pa 72 ora mas, conforme ley”, asina Prome Minister Evelyn Wever-Croes a anuncia den un relato di prensa.

Team di Calamidad Nacional ta di opinion cu e decreto gubernamental ta necesario pa garantisa cu e Crisis no bira un Calamidad. Minister Presidente Evelyn Wever-Croes mes momento ta sigura cu e salud di pashent y salubridad publico ta garantisa pa cu dr.Horacio E.Oduber Hospital y Aruba.

Parce cu e team di Calamidad ta pidiendo Hospital pa nombra un “Crisis Manager” y lag’e encarga cu e “crisis” aki, pa sigura cu e no ta crece y bira un calamidad. Sinembargo, Hospital ta convenci cu nan mes tin e situacion bou control caba. Nan ekipo di IT hunto cu un compania internacional specialisa den atakenan cibernetico a repasa e protocolnan, e daño cometi y e ahustacionnan cu por haci pa purba evita ripiticion den futuro.

Di otro banda, Directie Volksgezondheid Aruba (DVG) ta den contacto estrecho cu PAHO pa mira cu si na nan nivel por manda un Crisis Manager pa yuda Hospital na Aruba, mientras cu for di Inspectie Volksgezondheid Aruba (IVA) ta explorando si via Inspectie di Hulanda lo por tin un experto pa bin brinda sosten temporal na Aruba. Mester menciona cu Hospital mes tin un experto for di Hulanda cu probablemente lo yega Aruba e siman aki ainda pa brinda asistencia y garantisa cu e situacion ta normalisa.

Expertonan ta sinti cu “politica” a haci e asunto di “hacking” na Hospital un crisis mas grandi cu e ta den realidad. A pinta un situacion fatalista, envolvi varios departamento di Gobierno cu no tin ningun rol pa hunga den un situacion asina y a hasta uz’e na Hulanda den Conseho di Minister di Reino pa yuda Aruba “scapa” di un “aanwijzing” argumentando cu nos Hospital ta plat y comprometi dor di hackers internacional.

Un observacion interesante den henter e “crisis” aki ta cu Gobierno mesora a apunta Jerry Staring na cabes di e comision di calamidad pa maneha e crisis na Hospital den nomber di Minister Presidente. Esaki ta e mesun Jerry Staring cu Gobierno kier kita for di DVG pasobra supuestamente e no ta apto pa maneha 160 trahado na DVG pero si ta apto pa maneha un crisis den un Hospital cu mas di 1000 empleado y pashent envolvi. E casonan den Corte cu lo sigui lo bira masha interesante awo.