Hospital ta a ahusta regla pa bishitante cu e pashent na prome luga

Gobierno di Aruba a anuncia suavizacion di medidanan di Covid-19 pero alabes tambe cu cada establecimento por aplica e regla cu nan ta desea pa loke ta tapaboca.  Mirando e nucleo di Dr. Horacio E. Oduber Hospital cual ta cuido medico, a dicidi di keda implementa e regla di bisti tapaboca pa proteha e pashent cu ta nos prioridad. Bistimento di bo mesun tapaboca ora di drenta Hospital ta keda na vigor pa bishitante di pashent y tambe pa clientenan cu tin un cita. Pues tur persona incluyendo personal cu ta drenta Hospital mester sigui bisti tapaboca. 

Ademas, Hospital ta anuncia e siguiente ahustacionnan pa loke ta orario di bishita, regla y cita.

Orario di bishita unidadnan di cuido:

Ta permiti solamente 1 (un)  bishitante pa pashent interna durante cada ora di bishita. Lo tin dos orario fiho pa dia pa pashent por ricibi bishita. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber. 

Na momento di yega Hospital por fabor acudi na nos miembro di siguridad den e lobby na entrada principal. Despues di haci algun pregunta lo duna un carchi cu e number di camber riba dje, cual ta e prueba pa por subi y haci e bishita na e orario stipula. Na momento di termina bo bishita mester entrega e carchi aki bek cerca e personal di siguridad. Corda haci uzo di e ora aki pa trece paña of cualkier otro cos di cas pe pashent. 

Orario di bishita ICU:

Orario di bishita di ICU ta di 11.30 – 13.00 y 19.00 – 20.00 

Ta permiti solamente un bishitante pa cada orario di bishita. E ta keda na e famia cercano mes pa regla ken por haci bishita na e pashent pa evita aglomeracion di hende den HOH. 

Departamento di mucha:

Bishita na departamento di mucha ta wordo regla hunto cu e dunadonan di cuido. Tambe Hospital kier anuncia cu a hisa e edad pa mucha na departamento di mucha di 14 pa 18 aña. Esaki conforme e normanan di Hulanda pa loke ta pediatria. 

Excepcion

Pa algun pashent tin excepcion cual ta rekeri un dagpas, manera cuido intensivo (ICU),  departamento di mucha y maternidad. Tambe tin excepcion den caso cu pashent ta terminal. Tur e afspraaknan aki, manera ya ta e caso, ta wordo traha hunto cu e manager di e departamento, pashent y famia.

Departamento di Emergencia:

Tur persona mester acudi cu tapaboca bisti. Tambe nos ta recorda cu un persona solamente mag di drenta hunto cu e pashent y e tapaboca tambe ta obligatorio pe.

Operacionnan:

Si bo persona tin un operacion, lo yama pa haci un triage telefonico. Si tin sintomanan di Covid-19 lo mester haci test prome. E dia di operacion atrobe e nurse lo haci e triage prome cu e operacion.

Cita policlinica / Radiologia /Wondpoli/ Functie y tur otro servicio:

Acudi na e cita bo so y cu bo tapaboca bisti.  Tin casonan di excepcion cu e pashent lo mester di un ‘acompañante (mucha, pashent invalido, den rolstoel etc) cual tambe ta rekeri un tapaboca. Yega bo cita 5 minuut prome pa evita aglomeracion.

Por fabor keda mantene un bon higiena di man haciendo uzo di nos hand sanitizer prome y despues di haci bo bishita na HOH. Directiva, staf y personal di Hospital ta gradici tur hende pa nan comprension y cooperacion pa asina hunto nos sigui combati’e.