Un tubo di awa a rementa den Spoedeisende Hulp (SEH) of conoci como Eerste Hulp na Hospital mientras cu den otro departamentonan manera recepcion y revalidatie awasero a logra penetra y yena e areanan cu awa. Den e departamento di dialyse tubo di riool a kibra y percura pa desaster. For di 2:30am Hospital mes ta den un situacion di emergencia. Mientrastanto nan tin e situacion bou control y mayoria departamento ta habri pa atende pashent, aunke cu e seccion administrativo ainda no, debi na computernan cu a daña.
Con hopi e daño ta ainda no ta conoci. “Pero ta casi tur siman tin algo. Si no ta IT, ta sistema di coriente, awa of otro cos. Hecho ta cu e Hospital ta traha di material barata y inferior. E no ta traha di calidad y prueba di esey ta cu ki ora Bo kier cosnan ta daña, kibra of no ta funciona”, asina Gina Maduro, Presidente di Sindicato ABV a bisa. E mes ta un nurse trahando na departamento di emergencia SEH y como tal a presencia henter e lama di awa eyden awemainta.
Gina Maduro a expresa palabranan di gradicimento na e ekipo di ayudo, HVT y coleganan cu a lora manga di camisa di marduga pa atende cu e situacion. “Pero esaki no ta nos trabou. Esaki ta SOGA y e contratista. Nan ta responsabel pa e trabou haci aki”, asina e sindicalista a expresa cu un bos disgusta. El a enfatisa cu bou di e circunstancianan asina ta dificil pa brinda cuido na pashentnan cu ta yega Hospital malo pero ta bira mas malo ainda pa via di retonan dor di mal trabou di construccion.
No ta prome biaha cu tubo a kibra y percura pa yena e edificio cu awa. Ta casi un aña pasa, dia 8 di october 2018, cu algo similar a sosode. Un tubo di awa a rementa y yena parti di e edificio cu awa. Awe tabata pio, pasobra separa di e tubo cu a rementa, tabatin e factor di awasero tambe cu a hunga un rol y a logra pasa via dak y yega na departamentonan den e edificio recien construi.
Hospital lo demanda SOGA?
Parce cu tin intencion pa demanda SOGA pa e dañonan cometi y e erornan constante cu Hospital despues mester biba cune. Ta duna indicacion cu SOGA ta mas experencia den atende cu asuntonan financiero enbes di maneho di edificio y control riba companianan di construccion. E hecho cu Aruba tin un solo hospital, ta pone un presion mas grandi riba aspectonan di servicio, cumplimento y siguridad. Pashentnan no tin opcion, pues SOGA mester asumi su responsabilidad como doño di e edificio y atende cu e contratista cu nan mes a scoge pa haci e trabou aki, pa percura cu nan ta cumpli tambe!
Proyecto di riba 250 miyon florin
E doño di edificio di Hospital ta Stichting Onroerend Goed Aruba (SOGA), kende a percura pa financiamento, pa maneha y mantene e edificio nobo pa 25 aña largo. SOGA ta partner cu AIB-Bank, cu ta conta cu sosten di 18 instituto financiero local y internacional pa cera e suma total di 252.7 miyon florin, cu ta inclui gastonan di construccion, 4 aña di supervision, compra di e edificio actual, pago na arkitecto, preparacion y hopi mas. E construccion ta den man di OHL Arellano Construction Company di Miami cu tin como partner local ALBO Aruba, Bohama, AWM Caribe, Croon y C.H.S.
SOGA, funda na juli 2005 y maneha pa AIB-Bank ta e fundacion cu ta doño di e edificio di Hospital. Meta di SOGA ta pa construi y mantene edificionan pa Gobierno. E prome tres edificionan di SOGA tabata e oficina di Impuesto y Departamento di Finansa situa na Camacuri, tambe e oficina unda Aruba Tourism Authority ta situa riba L.G. Smith Boulevard y e edificio di DOW y DIP na Wayaca. SOGA no ta solamente construi, sino tambe mantene e edificionan. pone esaki abou den un alinea
