Horcan Chris a sigui su rumbo den Ocean Atlantico. Ademas di lama bruto cerca di costa oost, e no ta presenta ningun menasa pa Merca, segun National Hurricane Center. E horcan por corta pa Newfoundland, Canada pa diahuebs anochi, lagando 6 inch di awasero y causando inundacionnan repentino.
Ya pa 5’or di atardi, Chris tabatin biento di 90 miya pa ora y tabata moviendo noordoost cu 25 miya pa ora. E tabata aproximadamente 570 miya oost noordoost di Cape Hatteras, North Carolina.
Ta di spera cu e olanan genera pa horcan Chris lo afecta partinan di e costa di North Carolina y centro di Atlantico durante e proximo dianan, Hurricane Center a adverti.
Por lo menos 15 persona a hoga na Merca debi na “rip currents” den lama na 2018, asina Servicio Meteorologico di Merca a reporta.
E Centro di Horcan Canades ta pronostica cu zuidoost di Newfoundland ta e area cu mas por haya impacto directo di e tormenta. E pronostico ta premira cu Chris lo yega tera of ta pasa net zuid di e peninsula di Avalon como un horcan fuerte riba diahuebs anochi.
E area a wordo afecta pa awasero fuerte, biento fuerte y olanan cu marea di horcan a lo largo di partinan di e costa, segun e centro.
Chris ta e di dos horcan di e temporada di horcan di Altantico 2018, despues di Beryl.
E ta inusualmente tempran pa forma un di dos horcan: den promedio, esey no ta sosode te mas laat den zomer, rond di dia 28 di Augustus, segun e centro di horcan.
Beryl ta biniendo bek na bida?
E restonan di loke tabata Horcan Beryl por reorganisa na costa Oost durante fin di siman. E centro di horcan ta duna e tormenta un 50 porciento chens di regenera den un depresion tropical of tormenta dentro di e proximo dianan.
Si esaki reforma, por bisa cu e lo keda leu di e costa oost di Merca, segun AccuWeather. Beryl lo no pasa suficiente cerca di e costa di Merca, pa bin cu awasero of biento significativo, e experto den horcan di AccuWeather, Dan Kottlowski a bisa. E por pasa cerca suficiente di Bermuda y trece un poco awasero, biento sosteni y olanan bruto den fin di siman.
Mescos cu horcan Chris, lama bruto di Beryl por trece condicionnan peligroso riba beach, cerca di e costa oost den fin di siman.
