Den mi bida diario komo Parlamentario mi ta risibí hopi pregunta pa loke ta trata labor. Dor di risibí hopi pregunta mi a konstatá ku hopi hende no ta na altura di lokual lei laboral ta bisa.
Tin situashonnan ku a laga mi keda babuká di lokual ku persona ku ta laborá ta pasa aden ku nan doño di trabou. Komo representante di pueblo mi ta haña esaki algu inaseptabel. Nos ta den un pais di mas o ménos 150 mil hende di kual mayoria konosé otro i na mi humilde opinion nos mester por trata otro manera hende. E parti ku mas mi ta konsiderá esaki un abuzu ta e echo ku ta laga un persona laborá riba un dia di fiesta i ta page e mesun montante pa ora ku e ta risibí na momentu ku e traha un dia normal. Na momentu ku e trahadó reklamá i para pa su derechi e tin ku tende ku sea ta take e of leave it.
Tambe mamanan ku tin yu resien ku doño di trabou no ta tene konsiderashon ku nan entre otro nan dianan di verlòf ku lei ta duna. Asina tin hopi kos mas ku ta tuma lugá ku por tin komo konsekuensia ku e por afektá un hende su bida i tambe pone ku e mayor tin ménos kontakto ku su yu debí ku e ta traha di mainta pa anochi. Tur esaki nan por kondusí na problemanan sosial pa nos komunidat i tambe e mucha por kue mal kaminda debí ku e tin e guia nesesario na kas. Uitzendbureau tambe ta un situashon di kual tin hopi abuzu ta tuma lugá voraal pa loke ta trata salario. Tur esaki nan i mas ta puntonan di atenshon ku pa años niun hende no a para ketu na dje. Mi ta konvensí ku tin hopi hende ku lo ke pa bini ku kontrol i tambe sekshon di informashon pa asina trata di frena e abuzu laboral mas tantu posibel.
Otro ta e problema ku mas ta asotá ta trahadónan ku ta kobra sin un slip di salario pa asina por tin un bista kiko tur ta lokual ta ser kita for di nan salario. Esaki sigur ta stroba e trahadó di por sigui pa dilanti ora e kier un finansiamentu pa logra algu. Tambe esaki ta un forma pa keda sin paga primanan sosial i tambe impuesto ku mester bai den kaha di gobièrnu. Pero ta sigur ku e trahadó no tin un siguransa di trabou. Den nos trabou tambe nos ta enkontra ku trahadónan ku no sa ki ta e e primanan sosial òf impuesto ku ta kita for di un trahadó ku ta kobra suèldu mínimo.
Pago di trahadó tambe ta un situashon ku ta laga hopi deseá. Hopi ta trahadó ku ta wòrdu paga te den e di e 2 siman di luna. Konsekuensia di esaki ta ku e trahadó no por paga su debenan di fin di luna na tempu i ku tin ku bai fia sèn pa por hasi esaki. Kual tin diferente konsekuensia kun’e dor di pago di interes. Kiermen dor di e pago lat di salario ku ta un abusu ta trese konsekuensia finansiero insesario pa e trahado.
Mi mester bisa ku fuera ku e trahadó tin derechi e tin su obligashon tambe. Pero e abuzu labor ta hopi haltu aki na Kòrsou. P’esei frakshon di MAN a pidi un reunion relashoná ku abuzu laboral aki na Kòrsou. Durante di e reunion aki nos a pidi pa Minister di Desaroyo Sosial, Labor i Bienestar ku tin e
