Awe ta diaranson di shinishi y fielnan rond di Aruba a congrega na e diferente iglesianan. Esaki ta duna inicio di temporada di cuaresma. Segun Pastoor Andres, di e Parokia di Savaneta, aña pasa a cuminsa durante e pandemia, pero ainda diaranson di shinishi a celebr’e normal. E aña aki tabata tin hopi pregunta con ta bay celebra e dia aki pa motibo di e pandemia. For di
basta tempo a sali un declaracion di Vaticano, caminda a propone strooi shinishi riba cabes di cada persona, pa solamente bisa e formula un biaha so, caminda cu pueblo ta contesta tur hunto.
E hecho aki naturalmente a hacie tanto e fielnan como e Sacerdote cu e tapaboca bisti. Den e Diocesis tin e tradicion di pone e Cruz. Tabata tin hopi presion, hasta pa wak si ta sigui den forma tradicional.
Tabata tin siman pasa retiro di Sacerdotenan y na final di e retiro, Monseigneur a duna un declaracion local pa e Diocesis, unda cu a consulta cu un team di epidemiologo, a bisa cu no tin ningun peliger y cu por administra e shinishi den forma di cruz na frenta.
P’esey tambe tur Parokia ta hacie asina. Ta hunta e Cruz na frenta cu e shinishi y ta bisa e formula un biaha so, pa no papia dilanti cada persona pa tin menos contacto.
E ta keda na cada Pastor si e ta hacie cu e hendenan ta bin su dilanti. Hopi Parokia ta hacie caminda e pastoor ta yega na e banki unda cu e hendenan ta lanta para y tuma su shinishi. E misa di Diaranson di Shinishi, aunke ta un misa di hopi custumber den pueblo, ta keda na cada persona pa participa den e Misa aki y tambe pa tuma of no tuma e shinishi. Pesey tambe ta bisa di biaha tur hende cu kisas pa motibo di nan miedo na algo, ta opta pa no tuma shinishi. Nan ta liber pa tuma esaki.
Shinishi no ta obligatorio, pero ta mira practicamente 100% esunnan cu ta bin, ta desea nan cruz tradicional y ta expresa cu “nos kier cuminsa e tempo di Cuaresma consciente y di nos culpanan. Pero cu Dios su yudansa nos kier drecha nos bida.” E mensahe principal ta pa bolbe cerca Dios pa medio di actonan di penitencia, haciendo limosna, oracionnan, haci ayuno. E Evangelio di aki ta yama nos precisamente pa obranan di caridad, pa oracion y tambe ayuno, pa nos domina nos mes. E formula cu ta tende ora di haya shinishi ta: “cuminsa un bida nobo y kere den Evangelio.” E ta resumi tur cos, segun Pastor Andres. Cu ta desea di yega cerca Dios, haya su santificacion, bibando segun palabra di Evangelio, palabra di Hesus.
