Durante un konferensha di prensa na Digicel Megastore organisadónan Mark Benson Denz i Diederik Kemmerling a anunsiá fecha pa e promé E-Curacao Business Seminar riba djasabra 4 di mei 2019.
Un seminario hopi interesante ku 5 oradó internashonal for di e.o New York, San Fransisco, Hulanda, Aruba i Kòrsou lo elaborá‘riba ‘Social Media’, ‘Digital Marketing’, Inovashon i ‘Entrepreneurship. Pa Kòrsou esaki sigur ta algu úniko mirando ku den pasado konferenshanan sa tin 1 òf 2 oradó internashonal i esaki lo tin un total di sinku.
E konsepto a kuminsá 4 aña pasa na Aruba i a yena salanan ku mas di 700 persona inkluyendo interesadonan for di Kòrsou ku a biaha pa atendé e seminario. Awor e konferensha lo tuma lugá aki mes, pues ta hasié mas aksesibel pa tur hende por atendé i risibí ‘tools’ nan práktiko pa por mehorá nan mes den nan trabou òf mira mihó resultado den nan negoshi.
Tokante e oradornan:
Un di e oradornan prinsipal ta Sr. Ramon Ray for di New York. Ray ta un ‘Best Selling Author’ di buki nan tokante social media i entrepreneurship. E la presentá na diferente seminarionan internashonal manera South West by South West, WhiteHouse Washington i mas. Tambe vários medionan di komunikashon manera Fox i MSNBC ta entrevist’e pa su punto di bista. E lo duna tepnan práktiko di kon bo por haya un mihó resultado ku bo esfuersonan riba social media. Tambe for di San Fransisco e orador Mario Vinasco di e kompania UBER lo ta presente na Kòrsou. Mario lo elaborá riba teknologia splikando kon pa outomatisá merkadeo di un kompania ku ayudo di ‘Artifical Intelligence (AI). For di Hulanda lo tei e guru di inovashon, Daan Gonning (Rabobank & Google Project) ku lo elaborá riba inovashon por media di bos ku modulonan manera Google Voice Assistant. Di The Lab lo tin presentashonnan tambe di e senario aktual di red sosial awendia na Kòrsou. Ta bon pa añadí ku for di Kòrsou mes lo tin diferente invitado ku lo partisipá den diferente ‘Panel Discussion’ riba e tópikonan pa por mira e ángulo lokal tambe.
E seminario lo ta di 9 or di mainta te algu pasa di 1 or di mèrdia na Santa Barbara Beach Resort i lo ta un programa variá ku tópikonan interesante kombiná ku un tiki entretenimentu tambe. Karchinan ta optenibel na Bruna, Van Den Tweel, Mensing’s Caminada i tambe riba Internèt via www.e-curacao.net. E partnernan ku a uni pa por hasi e seminario aki posibel ta Digicel Business, Cpost i MCB. E-Curacao ta un produkshon di The Lab, Infinity Media supported by Tibbaa (Reinventing Ticketing) i Santa Barbara Beach & Golf Resort.
