Hopi elogio pa video mapping show di Elite Productions riba Hospital

502


Recientemente e compania audio-visual Elite Productions & Entertainment Aruba a sa di impresiona Aruba cu un bunita show visual riba e edificio di Dr Horacio Oduber Hospital Aruba. E show visual (video mapping) aki tabata na honor di tur frontliners cu a traha y lo sigi traha den e lucha contra covid19. E show visual a keda comparti den forma bibo atravez di Tele Aruba Canal 13 durante e programa di television di Elite esta ‘Live Sessions’. Algun minuut promer cu e show a cuminsa, Minister di Salubridad Publico Sr. Dangui Oduber tabata presente den studionan di Elite. Aki e la hiba algun palabra dedica na tur front liners. Despues di esaki a sigi pa un conteo di 10 pa 0 cual na e momento ey a show visual a cuminsa na Hospital. TeleAruba a transmiti e imagenan for di Hospital pa studio di Elite.

Locual tabata hopi bunita ta cu diferente front liners cu tabata trahando na e momento ey den Hospital y otronan cu no tabata trahando a para riba parkinglot di Hospital pa asina mira e show visual riba e edificio.

Animacionan di e director creativo di Elite esta Sr. Egmar Irausquin a ilumina e edificio den un forma hopi creative dunando un danki na tur front liners den diferente idioma. Ainda esnan cu no a logra di mira esaki por mira e ‘aftermovie crea pa Edward Silberie’ riba e facebook page di Elite Productions Aruba.

E programa ‘Live Sessions’ tur siman ta presenta diferente banda musical y durante e edicion aki e banda Le Groove a entretene tur televidente. E programa ta den aire tur diadomingo di 7 or pa 8.30 di anochi y e siman aki lo toca turno na Datapanik.

Un Danki na Dr Horacio Oduber Hospital, Power Generator, Gobierno di Aruba, Tele Aruba, Egmar Irausquin, Mark Benson Denz, MC Samil, Edward Silberie y e team completo di Elite Productions.