Te cu awe Gobierno di Aruba (GdA) ta keda para riba su posicion cu no ta kita e 12.6% y cu GdA ta invita tur sindicato pa bin sinta na mesa den un comishon y cu GdA ta dispuesto pa habri tur buki pa asina conhuntamente y transparentemente sondia e cifranan di GdA y delibera y formula proposicionnan pa “hunto” bay sinta na mesa cu Hulanda y “renegocia” e retencion di 12.6%. Sinembargo, tin tres problema fundamental cu e proposicion aki di GdA pa conhuntamente bin sondia e bukinan financiero di GdA.
Den e UitvoeringsRapportage (UR) di GdA di 3de kwartaal di 2021, pagina 30 y 31, GdA mes ta duna di conoce cu tin diferente topico di control y maneho di gastonan publico cu ta “niet controleerbaar” of “deels controleerbaar”. Dus, bisando aki, tin varios gastonan di GdA cual no ta controlabel of ta solamente partialmente controlabel.
E Uitvoeringsrapportage di 3de kwartaal 2021, pagina 3, ta habri cu un “DISCLAIMER” den cual, na un manera fini, ta wordo bisa cu GdA a haci su best pa compila e cifranan pero ta reconoce cu por tin gastonan no factura ainda y cu GdA a procesa e gastonan no factura aki “op basis van een zorgvuldige schatting”. Den e mes un Disclaimer aki ta menciona den e ultimo bullet cu e cifranan presenta ta “voorlopige cijfers” y cu nan no por wordo controla “naar juist- en volledigheid” door di Directie Financien. Dus, GdA mes no ta sigur di su cifranan.
Ningun Financiele Jaarrekening di GdA (desde cu Aruba a haya su Status Aparte) a wordo ge-audit (den e sentido di un detailed financial audit) door di auditors di un instancia independiente for di GdA y ningun Financiele Jaarrekening di GdA tin un goedkeuring di un register accountant independiente for di GdA.
Den e “Reactie op de derde uitvoeringsrapportage 2021” di CAft, pagina 7, ta bisa duidelijk, quote: “Het financieel beheer en de verantwoordingscyclus van Aruba zijn niet op orde”. Cu otro palabra, e maneho financiero y e ciclo di responsabilisacion pa cu e maneho financiero di GdA no ta na ordo. Pueblo ta asumi cu e cifranan aki ta real y cu nan ta cuadra. Den control y audit financiero no por “asumi”, pero mester traha cu echonan cu ta ‘traceable’ y ‘auditable’. Awo, GdA kier pretende di ta ‘honesto y habri’ pa hunto cu sindicatonan “habri bukinan di GdA y transparentemente pasa door di e cifranan”.
Pero ki garantia tin cu e cifranan aki ta corecto? E cifranan raporta den e Uitvoeringsrapportagenan ta cuadra? E Uitvoeringsrapportagenan ta documento financieramente real of nan ta ‘documentonan politico’? Cua instancia independiente (dus no un dienst di GdA) ta audit detayadamente GdA su financiele jaarrekening? Algemene Rekenkamer Aruba (ARA) ni Centrale Accountantsdienst (CAD) ta audit (den e sentido di un detailed yearly financial audit) e relatonan financiero anual di GdA. Pero GdA si ta exigi di tur compania estatal pa un instancia independiente audit detayadamente nan relato financiero tur anja. Awo, e pregunta ta keda: cua instancia independiente ta audit detayadamente e relato anual financiero di GdA?
Cua register accountant independiente ta firma e relato financiero anual di GdA? Si no tin un control imparcial, detaya, efectivo y independiente di e relatonan financiero anual di GdA, tur aña GdA por laga pasa un ‘6’ pa un ‘9’ y pueblo (lesa Parlamento) no tin e ‘checks & balances in place’ pa por tin e garantia cu e cifranan di gasto ta controlabel, real, y integro na procesonan di contabilidad. Con por bay papia di cifras, si ta e caso cu GdA mes ta raporta cu su cifranan no ta controlabel?
