Hopi daño material den accidente marduga riba Sasakiweg

Awe diaranson algo pasa di 12.10am a sosode un accidente riba Sasakiweg, net prome cu e rotonde di Super Food. Un auto marca KIA modelo Picanto color blauw, cu number A-70429, pa un of otro motibo a baha caminda y dal den un palo di luz. Consecuentemente e palo di luz a dobla di tal forma riba caminda cu mester a desvia trafico mesora.

Chauffeur di e auto a conta Polisnan na e sitio cu e tabata bayendo den direccion zuid, pero cu na dado momento su auto a cuminsa haci straño riba caminda. Dado momento e auto su so a baha caminda y dal den e palo di luz.

Polis a solicita presencia di NV Elmar, cu a yega cu un truck na e sitio pa kita coriente for di riba e palo di luz, kita e palo completamente pa prepara pa den dia instala un nobo.

Ambulance a presenta na e sitio pa haci un check-up riba e chauffeur di auto. A sospecha cu debi na e impacto e lo por a sufri daño personal, pero a resulta cu despues di un revision na e sitio mes, el a prefera di no bay Hospital.

Mester menciona si cu e daño material ta considerabel, tanto na e auto mes pero tambe na e instalacion di luz y cabelnan di coriente di NV Elmar.

Comments

comments