For di momento cu e departamento di Prensa di Gabinete Wever-Croes a informa cu Conseho di Minister a decreta diaranson awor como un dia di “Luto Nacional”, cu a surgi preguntanan di tur banda riba con mester intepreta dicho decreto. Tin scol? Gobierno ta duna liber na su empleadonan? Comercio mester cera? Radionan mester adapta nan programacion? E ta un dia oficial cu mester paga dobbel si traha toch?
Lamentablemente e preguntanan aki a keda sin contesta pa cual varios medio, entre nan esunnan cerca di e Gobierno na mando, a lansa varios pregunta critico riba e nificacion of mas bien, con comercio y publico mester interpreta un “Dia di Luto Nacional”.
Prome Minister Evelyn Wever-Croes a opta pa no contesta nos e pregunta pero si a duna splicacion na otro miembronan di prensa, argumentando cu e ta un dia pa reflexion pero cu scol ta sigui normal, trabou ta keda normal y cu no lo cera ningun negoshi e dia ey.
Cu e contesta aki, e ta keda un interogatorio riba kico e ora ey ta un dia di luto nacional. Ta mas cu obvio cu e falta di experencia den e ekipo di comunicacion di Gobierno a pone cu a uza un nomber robez pa un ocasion den cual Gobierno ta desea pa comunidad convivi cu famianan di e dos muchanan cu a perde nan bida recientemente.
