Hopi Arubiano biahando cu vakantie

Den e dianan aki normalmente Aeropuerto ta yen di pasahero, hopi biaha cu vuelonan extra for di Venezuela pa trece turistanan cu ta scoge Aruba pa pasa nan “Semana Santa”. E aña aki sinembargo, debi cu a cera frontera, ningun vuelo no por sali for di Venezuela pa Aruba. Tampoco a nota extra vuelo for di Colombia of Panama pa Aruba, pa acomoda e fluho di Venezolanonan.

Locual si ta notando awe y e siman aki, ta un cantidad di Arubiano biahando pa Merca pa pasa algun dia di vakantie. Den esey ta corda tur pasahero pa Merca, cu lo por experencia filanan mas largo cu normal, pa cual ta necesario yega mas trempan na Aeropuerto. Ta conseha cu si ta biahando pa Merca, pa yega 3 ora prome cu e vuelo, pa sigura cu e proceso di check-in, control di siguridad, control di Migracion, control di siguridad atrobe, control di Migracion Mericano y control di siguridad atrobe, ta sosode den e tempo stipula. No lubida cu tin varios vuelo saliendo pareu for di Aruba pa Merca, pues e compartimento ta bira ocupa.

Unda e Venezolanonan a scoge pa pasa dianan di fiesta, no ta conoci. Probablemente ta scoge pa keda Venezuela mes. Ta bon pa enfatisa cu Venezuela semper tabata e di dos mercado mas importante pa turismo di Aruba, despues di Merca.