E anticipashon di parti di e team di Aruba Soccer Academy y di e hubentud di Aruba, Boneiro y Korsow pa cu e Sparta Rotterdam – ASA Soccer Camp ta grandi. E camp cu lo bay tuma lugar di 2 pa 6 di April ta practicamente sold out den corto tempo. Un gran parti di expectativa ta e hecho cu Sparta Rotterdam ta mandando dos di nan jeugdtrainers mas fuerte cu nan tin, esta Dolf Roks y Nourdin Boukhari. Dolf Roks ta e Hoofd Jeugdopleider di Sparta Rotterdam, cual ta algo hopi significante y grandi pa Aruba.
Nourdin Boukhari ta un medio campo originalmente di Marokko cu a yega di hunga profesionalmente pa Sparta Rotterdam, Ajax, FC Nantes, NAC y AZ y ta conosi pa su abilidad tecnico. Tempo cu Boukhari a train na ambos Ajax y Sparta e tawata cai bou guia di director tecnico e tempo ey cu tawata e bon conosido Danny Blind. Ademas di a yega di hunga den Eredivisie cu Sparta, Boukhari tin experiencia internashonal tambe caminda ela yega di hunga pa Turkije y Polen.
Dolf Roks actualmente te Hoofd Jeugdopleiding en Scouting di Sparta Rotterdam, y ta un nomber bon conosi den mundo di futbol Hulandes. Tambe Dolf Roks ta fundador di Jeugd Voetbal Opleiding Zeeland, cu ta un opeidingspartner di Sparta Rotterdam. Por wordo remarca cu e Jeugd Opleiding di Sparta Rotterdam a yega di gana premio varios biaha den pasado como “Beste Jeugd Opleiding van Nederland” cual ta duna un indicashon di e calidad tecnico cu e Sparta – ASA Camp lo bay tin. Loke ta hopi interesante ta cu Dolf Roks ta Hoofd di Jeugd en Scouting, cual kiermen cu e tin autoridad pa scout posibel talento hoben Arubiano.
ASA ta sumamento contento cu aporte di su sponsornan cu ta hasi e camp aki un realidad, y kier a gradisi muy en especial e main sponsor di e camp cu ta Benu Pharmacies cu ta un partner integral pa e camp aki por bira realidad. Tambe ASA kier gradisi di curason su otro sponsornan cu ta Divi & Tamarijn All Inclusive Resorts, doc Opleidingen, Arubiano One Happy Flip Flop, Wendy’s Aruba, Cooper Tires, Quinta del Carmen, White Modern Cuisine, Taco Bell, Deli Caribbean y Ferm Trading.
