E compania local Elite Productions & Entertainment a uni hunto cu Tele Aruba pa asina bin cu un programa semanal cu jama ‘Live Sessions’.
E promer programa lo ta diadomingo awor 26 di April 2020. E concepto di e programa lo ta uno cu lo wordo transmiti den forma bibo tur diadomingo for di 5.30 pa 6.30 di atardi riba Canal 13/23 y tambe riba facebook di Elite Productions & Entertainment.
Elite lo transforma nan ‘warehouse’ den un forma unico cu un stage impresionante unda cu diferente artista local lo haya e oportunidad di toca pa asina entretene nan fanaticonan cu nan mihor exitonan. Algo cu sigur lo hala atencion tambe cu lo bay tin algun edicion cu lo tin un combinacion di artistanan cu normalmente no sa toca frecuentemente cu otro. E objectivo tambe ta pa asina promove mas hende keda na cas y mantene nan mes na ‘social distancing’. E team cu lo ta trahando tambe lo tene cuenta cu esaki durante e produccion y pa medio di tecnologia esaki lo bira mas facil.
E team di produccion a traha duro digitalmente via Zoom Meetings y Google Meet pa asina produci un transmision riba nivel. Pa loke ta e contenido di e programa lo tin algun entrevista cu personanan cu ta traha den e industria di evento. Nos tur sa cu e industria aki tambe a bay plat y e profesionalnan lo comparti na experiencia cu e hecho aki. Tambe lo tende con nan ta preparando pa e momento cu e situacion cuminsa normalisa. Cada entrevista lo ta graba na un localidad unda cu por mira paisahe bunita di nos dushi isla.
E prome programa lo tin como invitado Chayo Tromp di Honeypot. Chayo lo tin algun di su musiconan tambe hunto cu ne. Den e programa Chayo lo presenta algun di su exitonan popular. E televidente tambe lo por duna comentario y hasi pregunta cual lo hasi e programa interactivo.
E presentador di e programa ta e conocido y talentoso hoben MC Samil.
Live Sessions ta un produccion di Elite Productions & Entertainment Aruba y Tele Aruba Canal 13. https://www.facebook.com/elitearuba/
