Diasbra den oranan di merdia pa atardi personal di Guarda Nos Costa a sigui cu nan accion di control riba personanan kedando Aruba di forma illegal. No solamente kedando illegal, pero cu ta trahando sin cu nan tin e permisonan necesario.
A controla den area di Malmok, na casnan den construccion y BINGO. Na un di e sitionan aki, por a mira con un homber a basha careda na momento cu personal di GNC tabata na bista. Den su intent pa huy, el a core drenta un cas, cu tin camara di siguridad. Propietario di e cas a bati alarma cerca e funcionarionan y asina a detene e persona aki.
Segun informacion no official, a aresta varios persona, Venezolano como Colombiano, na casnan den construccion yegando Tierra del Sol.
Autoridadnan tin atencion pa e tema aki, pa motibo cu tin dato di tur esnan cu ta drentando di forma legal, pero ta constata cu no ta e mesun cantidad ta sali bek. P’esey e tipo di accionnan ta importante. Banda di esaki, informacion no oficial ta indica cu e siman aki dos of tres boto a drenta cu personanan di Venezuela, apesar cu e lama ta basta bruto.
