Homber E.H. deteni como sospechoso pa tira Polis

E agente Policial cu a wordo tira a splica e coleganan cu ta dos homber color scur y cu paña preto a los tiro riba dje. Mesora e buskeda a cuminsa pasobra segun informacion e dos criminalnan arma a bay na pia. Polis tabata tin bista caba pa diferente kiebro ultimamente den e area di Savaneta. Polisnan a base di informacion a bay na e prome adrenta na Savaneta. Eynan a haci e detencion di e prome sospechoso Edward H. E descripcion ta cuadra cu esun cu Polis a haya. Algun hende tambe a duna Polis basta informacion. E buskeda a sigui mas caminda den e area. Tin cierto cas bandona banda di lama cu tambe e agentenan a drenta pasobra eynan sa señala e sospechosonan. E sospechoso Edward H a wordo atendi pa e agentenan cu a bay na e cas den Savaneta unda e lo ta biba. Cuerpo Tecnico a wordo avisa pasobra mester haci cierto controlnan mesora na curpa di e sospechoso. Riba su curpa por haya cierto evidencia cu ta importante pa e investigacion. Na costa unda tabata tin e fabrica di cria pisca y cabaron tambe e agentenan a drenta. K-9 Unit a wordo pidi pa presenta na e sitio mirando cu tin manera un mondi y e cacho di Polis tabata importante pa yuda den e buskeda.