Riba dia di Señor polis mester a detene un homber pa menasa di morto. Tabata alrededor di 4:30 pm ora cu polis a presenta na e restaurant West Deck. Segun informacion, algo a bay robes cu un grupo riba boto y na dado momento a baha un persona for di dje. E homber cu nan a baha abou parce a menasa un hende muhe cu morto.
Parce e homber a paga un hende 25 florin pa bah’e na West Deck, unda su auto ta staciona. Na dado momento e boto tambe a presenta na West Deck. E señora a conta cu e lo entrega denuncia contra e homber.
Na final a detene e homber y a transport’e pa ward’i polis. E homber tabata sinti su mes basta halsa y tabata balota e agentenan na mas cu un ocasion.
E no tabata kier pa e agente kita su cadena den e proceso di detencion, segun e sospechoso, e cadena bal mas cu cinco mil euro; y cu e agente no tin e placa ey. Tur cos ta mustra cu e sospechoso y denunciante ta pareha, mirando cu a co’i yabi di un apartamento den tas di e sospechoso.
