Korsou: Hòmber detené pa asesinato

Djamars 7 di mei 2019 alrededor di 13.04, polis a detené e hòmber sospechoso Y.R.W., nasé na Repúblika Dominikana di 38 aña di edat, pa asesinato. E sospechoso aki, djamars dia 9 di aprel 2019 alrededor di 23.50’or, a maltratá un hòmber.

Esaki a tuma lugá na altura di un pòmp di gasolin den Saliña. Despues ku e víktima a wòrdu interná den SEHOS pa tratamentu médiko, dia 26 di aprel 2019, el a bin fayesé a konsekuensia di e leshonnan ku el a risibí. E víktima ta: Selwyn Richard Benito Rosalina, nasé na Kòrsou dia 21 di mart 1963. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.