Homber culpabel di relacion cu menor no a haya castigo

Diahuebs mainta Hues a declara un acusado liber di persecucion penal a pesar cu e ta culpabel di a comete e delito.
Ta trata di e homber Jowayne Jones, kende a presenta diferente biaha den Corte. Cada biaha tabata pospone su caso pa un motibo of otro, entre otro rapport di Reclassering cu no a wordo pidi. Y awe den Corte e abogado a bisa cu en realidad mester a pidi un rapport psicologico tambe mirando su condicion.

E tin problema di desaroyo y esaki tabata visibel den e forma cu e tabata comporta su mes. E acusacion contra dje ta cu el a tene relacion sexual cu un mucha muhe cu tabatin 15 aña. Esaki ta algo cu el a admiti y a bisa cu tur dia e ta lanta pensa e cos malo cu el a haci. Cu si e tabata sa cu ta un mucha, e lo no a hacie.

Fiscal a pidi un castigo di trabou pa comunidad, un castigo condicional cu dos aña di prueba y guia di Reclassering.
Despues di a scucha esey, y su abogado mr. Emerencia, e Hues a bay pensa un rato kico e ta haci cu e caso aki, Na final el a dicidi cu e homber ta culpabel pero no ta castigabel. Pasobra na momento di a comete e delito e no tabata consciente di e delito. Pues el a liber’e di persecucion penal.


Pa mas informacion, lesa e siguiente edicion di TREMPAN.