Un rato pasa alrededor di 5:00pm a bati alarma p’un grupo di persona cu tabata tira piedra riba auto den Noord, na altura di NG Supermarket. Prome informacion ta papia cu un grupo di hoben den cercania di e supermarket mester ta tirando auto cu piedra.
No ta conoci si ta den un wega nan tabata of kico tabata e intencion mirando cu a tira piedra riba un carwash tambe den vecindario. Nan momento di goso no a dura mucho.
Autoridad a cuminsa un buskeda masal den area di Kamay, Noord y Semeleerstraat pero sin resultado. Djey un patruya atento a topa cu un homber cu tabata cuadra cu descripcion duna den Caya Cocolishi.
Mesora a deten’e y transport’e pa ward’i polis. Ey lo atende cu ne riba su comportacion, specialmente riba e tiramento di piedra riba propiedad di otro hende. Polis lo mester splic’e di e consecuencia cu e acto aki por tin pe, tanto penalmente como civilmente. Ta cuestion di hinca curpa den gasto innecesario y eventualmente haya problema cu husticia sin spera.
