Algo pasa di 11’or y 30 di diabierna anochi, patruya di Noord a ser manda na un cas na Opal, caminda un persona a wordo hinca. Polis a bay di biaha na e sitio y na nan yegada, nan a bin topa cu un homber cu hinca na su pia. Polis a tuma dato di e homber aki y el a conta cu e ex di su pareha lo a bin na e cas y a purba di bula bentana di e cas. Pa su mala suerte el a topa cu e pareha di su ex. Ora el a purba bula paden, e homber a bay pa skop e invasor. E homber, kende tabata tin un cuchiu den su poder, a hinca e pareha di su ex den su pia. Despues di esaki el a core subi su auto, un Suzuki Baleno color cora kima, cu plachi di number traha y a baha na catuna. Famianan a declara na polis cu e ex pareha ta biba na un di e casnan na Sero Patrishi. Patruya di Playa a bay na e cas menciona pero no a topa cu e auto y ni cu e persona menciona, Slachtofferhulp tambe a presenta na e cas pa asina atende cu e famia.
