Homber a scapa di pasa anochi den cel

E problema cu personanan bou influencia di alcohol, mas ainda awo cu ta fin di luna, a cuminsa for di den oranan di atardi. Banda di dos pasahero burachi cu a forma problema na aeropuerto, tambe tabatin e caso di un homber burachi, kende na ultimo ora a scapa di pasa e resto di diabierna den un cel.

Tabata rond di 4.35 di atardi cu polis a bay den Maria van Oranjestraat, na San Nicolas. Un persona eybanda a yama polis pa motibo cu el a mira un homber cu no tabata por a cana dje bon ey, no pasobra e ta malo pero el a bebe demasiado. 

Esey ta loke e polisnan tambe a mira momento cu nan a yega na e sitio pa cual a pidi e auto di transporte pa hib’e warda. Net e momento ey un familiar a yega y a informa cu e tabata yam’e di basta rato pa bis’e cu e ta bin bsc’e, pero e meneer no ta contesta celular. A resulta cu el a laga su celular na cas. A lague bay cu e famia y el a scapa di pasa varios ora den cel na Warda di Polis.