Homber a bay cana y bin haya su auto medio kima na Eagle Beach

4869

Diamars despues di 8’or di anochi a drenta informe cu un auto tabata na candela na e comienso di entrada na Eagle Beach. Tabata net un tiki pazuid di Oceania Residences. Segun por a compronde na e sitio di algun persona, cu algun bon samaritano a wak e candela, pero debi cu e auto tabata na lock, nan a coi un baranca y kibra e bentana di e auto na banda di e driver (RHD) y a logra di habri e hood y paga e candela cu a cuminsa kima e porta di e chauffeur parti di paden.

Debi cu e doño di auto mes no tabata na e sitio, Polis a keda cuida e auto en espera di dje. E doño di auto mes a yega na su auto despues di 8’or y mey y a haya e sopresa desagradabel di wak su auto cu glas kibra y daño di candela parti paden di su vehiculo. E a declara na Polis cu e tabata cana te banda di Alhambra y despues pa bin back y haya su auto den e estado ey cu Polis para banda di su auto.

E porta pa colmo tabata tin dificultad pa habri, pero a drenta via e otro porta y asina mes start e auto y logra di bai cu su auto. Awo despues di un cana saludable ta haya su mes cu un gasto inespera.