Hobennan ta conta nan dolor cu autoridad ora di tira pisca

6613

Kevin van Unen a bay pisca diabierna ultimo. Mientras cu a bin bek tera, polis a para nan pasobra nan tabatin harpoen riba nan. A bay cu nan pisca tambe. Te asina leu, den e situacion aki, e mes no tin trabao y piscamento ta un manera pa hiba cuminda cas. Ta compronde cu polis ta haci nan trabao y no ta purba di ta fastioso contra nan. Pero ta pidi pa tin un poco compasion y curason pa nos hendenan cu ta lucha. 

No ta tur hende na Aruba ta pasando un bon tempo den e crisis aki. E mes a perde su trabao recientemente na april y te ainda no por haya trabao. Van Unen ta studia y el a bin biba na Aruba for di Hulanda y no por haya trabao. Awo pa haci esaki, ta sinti cu no por haci nada y no sa ni unda pa bay y ken pa puntra y kico pa bisa. A purba di papia cu minister pa yega na un manera y ta compronde cu esaki ta un proceso, pero no sa mas kico pa haci.

Hobennan ta conta nan dolor cu autoridad ora di tira pisca

Wardacosta ta sigui controla uzo di harpoen: Hobennan ta conta nan dolor cu autoridad ora di tira piscaPa mas info: https://24ora.com/hobennan-ta-conta-nan-dolor-cu-autoridad-ora-di-tira-pisca/

Posted by 24ora on Sunday, August 23, 2020

Piscamento
Den cercania di Lighthouse nan ta bay pa tira pisca. E ta un luga basta conoci. Ta trata aki di un lama basta bruto y grandi. Pa tur esnan cu ta haci e deporte aki, van Unen tin un respet grandi pe y ta pidi pa tur hende pa compronde e deporte aki. Por perde bida cu ne. No solamente e ta un deporte, pero e por trece cuminda cas.

Van Unen a bay pa coy su auto pa despues bay hinca e piscanan aden y na momento pa haci esaki, a ripara un auto blanco acerca y tabata trata di kustwacht. E no por a haci mucho mas. Awor aki el a perde su piscanan y su harpoennan. E ta sigui splica cu el a coy su coy piscanan for di vloer y e ora e kier a bay purba di tiranan den awa pa asina e por ta mas dificil pa haya nan.

Un di e agentenan a bira poco agresivo riba dje. Despues a coy e armanan fo’i dje y tiranan riba tera. Van Unen a splica cu pa e momento ey el a cuminsa graba e situacion. E tabata sinti cu e asunto aki lo a bay caba na malo. Por a mira tambe den e video a menciona cu van Unen lo a mishi cu e persona, pero segun e cabayero, no ta asina. El a mishi su harpoennan pa e coynan y benta nan den awa. Na final, e ta contra ley y mester acepta esey. E parti si cu e no por acepta cu nan a bay cu su cuminda, cual ta e piscanan.

Motibo pa detencion?
A yega un momento cu e agente a bis’e pa stop di harrass’e, sino ta detene van Unen. E mes ta asumi cu e persona ta autoridad y por haci esaki. Tambe el a menciona cu el a lanta cu un boei y esey ta pa su siguridad. E boei no ta eynan pa sconge. E ta bay cu su boei oranje y grandi pa hende sa cu tin hende den awa. Awor aki ta pone pensa cu e siguiente biaha cu e bay awa, e ta bay sin boei. E dia cu e hoga, ta bye bye tur hende.

Regula e situacion
Van Unen ta pidi pa un manera pa regula e asunto di harpoen of spearfishing. Si por haci esaki na un manera of otro cu e piscadonan den crisis por haya un poco pan riba mesa, mescos cu e otronan cu si tin trabao, ta hopi bon.

No mester bisa esaki pa haci e ley aki como un free for all pa tur hende por drenta awa y haci kico cu nan kier. Pero sikiera bin cu un manera cu por label. Bin cu un area caminda e hendenan por bay. Pa colmo tambe, ta net e area aki, esta tras di Lighthouse, ta net e area aki ta caminda nan ta bisa cu nan ta tapa nan cara pasobra ta bay tira pisca. Pero nan a bin par’e net na e area aki, cual van Unen no ta compronde. E ta sinti cu e minister por yuda. Si nan por a bin cu yen di ley durante di e crisis, manera Toque de Queda, Shelter in Place, etc. pakico no por bin cu un ley pa e piscadonan cu no tin trabao. Ta basta hende nan ta na Aruba cu no tin trabao.

Ta stima lama
Kevin van Unen stima lama. Semper nan a crece den lama for di chikito. Semper nan a wordo siña di nan tata pa respeta lama. Haci cos manera mester ta. Ora cu nan bay pisca, no ta tur cos nan ta gara y ta bay cu ne. Si e pisca ta chikito, ta lag’e bay. Esey ta na piscamento caba. Pero si ta pa tira pisca, nan mes ta selecta kico nan ta tira. Nan sa kico nan ta wak nan dilanti. Segun van Unen e piscanan cu nan ta tira ta di abundancia na Aruba, Calala y Bastobers, cual tin hopi. Van Unen no tey pa caba cu lama. Dia cu lama caba e no por gosa di dje mas. E mes kier keda gosa for di dje y no esey so. Si e haya yiu of algo pa futuro, nan tambe mester por gosa di dje, mescos cu el a gosa.